काठमाडौं,  चैत्र २२ । नेपालमा वेलनेस तथा स्पा सेवाको बढ्दो मागलाई ध्यानमा राख्दै ट्रान्क्यूलिटी स्पाले ग्वार्काे स्थित रोयल ट्युलिप काठमाडौंमा नयाँ शाखा सञ्चालनमा ल्याएको छ । यस शाखामा आधुनिक पूर्वाधार, अनुभवी थेरापिस्ट तथा उच्चस्तरीय सेवाको संयोजनमार्फत ग्राहकलाई विश्वस्तरीय अनुभव दिलाउने उद्देश्य राखिएको छ।

पूर्ण सुविधा सम्पन्न यस शाखामा थर्मल हाईड्रो थेरापी, परम्परागत मसाज, प्रिमियम सैलुन, स्विमिङ्ग पूल तथा जिमलगायत सम्पूर्ण वेलनेस सेवाहरू उपलब्ध छन्। ग्राहकहरूको मागअनुसार ललितपुरमा पनि यस्तै सुविधा सम्पन्न शाखा विस्तार गर्ने योजना कम्पनीले अघि सारेको छ।

गत दुई दशकदेखि वेलनेस संस्कृतिको प्रवद्र्धन गर्दै आएको ट्रान्क्यूलिटी स्पाले हालसम्म देशभर १८ भन्दा बढी शाखा सञ्चालनमा ल्याइसकेको छ। यीमध्ये धेरैजसो शाखा प्रतिष्ठित होटल तथा पर्यटकीय गन्तव्यमा रहेका कारण पर्यटकबीच पनि यसको लोकप्रियता बढ्दै गएको छ।

द सोल्टी काठमाडौं, र्याडिसन होटल, रमादा बाई विन्डहम, होटल शंकर, चन्द्रागिरी हिल्स रिजोर्ट, रोयल ट्युलिप चितवन, फिसटेल लज बाई अन्नपूर्ण, माउण्टेन ग्लोरी, सिदार्थ भिलासाजस्ता होटलहरूमा सेवा विस्तार गरिसकेको कम्पनीले मलेसियामा रहेको शाखामार्फत त्यहाँका ग्राहकहरूको मन जित्न सफल भएको छ।

कम्पनीका प्रमुख परिचालन अधिकारी रनिल फैजुले नयाँ शाखा सञ्चालनले राजधानीमा उच्चस्तरीय वेलनेस सेवाको पहुँच विस्तार हुने विश्वास व्यक्त गरे। उनका अनुसार व्यस्त जीवनशैलीबीच शारीरिक तथा मानसिक सन्तुलन कायम राख्न स्पा तथा वेलनेस सेवाको आवश्यकता दिनानुदिन बढ्दै गएको छ।

त्यस्तै, कम्पनीका अध्यक्ष भुवन फैजुले प्रमुख पर्यटकीय तथा आतिथ्य क्षेत्रमा गुणस्तरीय स्पा सेवा विस्तार गर्नु संस्थाको दीर्घकालीन रणनीति रहेको बताए। उनका अनुसार यस पहलले वेलनेस पर्यटनको विकासमा समेत योगदान पुग्ने अपेक्षा गरिएको छ।

हाल ट्रान्क्यूलिटी स्पाले वेलनेस उद्योगमार्फत देशभर करिब २५० रोजगारी सिर्जना गरेको छ। नयाँ शाखा सञ्चालनसँगै होटलका सेवाग्राहीहरूले प्रिमियम आतिथ्य सेवासँगै एउटै स्थानमा वेलनेस सुविधा उपभोग गर्न सक्ने विश्वास कम्पनीले व्यक्त गरेको छ।

The post ट्रान्क्यूलिटी स्पाको नयाँ शाखा रोयल ट्युलिप काठमाडौंमा first appeared on

काठमाडौं, चैत २० । नेपाल अन्तर्राष्ट्रिय चलचित्र महोत्सव (नीफ)ले रूसी विज्ञान तथा संस्कृति केन्द्रसँगको सहकार्यमा शुक्रबार काठमाडौंको रूसी हाउसमा “रूसी फिल्म डेज” उद्घाटन गरेको छ । सो अवसरमा अन्तरिक्षमा खिचिएको पहिलो चलचित्र प्रदर्शन गरिएको छ।

उद्घाटन समारोहमा नेपालस्थित रूसका कार्यवाहक राजदूत तथा परामर्शदाता रिनचेन सोक्सायेभ र नेपाल ललितकला प्रतिष्ठानका सदस्य–सचिव देवेन्द्र कुमार काफ्ले उपस्थित थिए।

सोक्सायेभले समाजमा सिनेमाको प्रभावलाई जोड दिँदै चलचित्रकर्मीहरूबीच सद्भाव कायम गर्नुपर्ने आवश्यकता औंल्याए। उनले नीफ को नवौं संस्करणमा नेपालको पहिलो रंगीन चलचित्र कुमारीका निर्देशक, अभिनेत्री तथा छायाकारसँगको भेट सम्झिए।

प्रतिष्ठानका काफ्लेले नेपाल–रूसबीचको ७०औं कूटनीतिक सम्बन्धको अवसरमा भएको सहकार्य विशेष महत्वको भएको बताए।

नीफ अध्यक्ष केपी पाठकले यस साझेदारीले द्विपक्षीय सम्बन्ध अझ सुदृढ हुने विश्वास व्यक्त गरे।

सह–अध्यक्ष अनास्तासिया खाख्लोभाले दर्शकलाई रूसी हाउसमा आयोजना गरिएको चलचित्र प्रदर्शन तथा एआई फिल्म कार्यशालामा सहभागी हुन आमन्त्रण गरिन्।

महोत्सव अगस्ट नामक द्वितीय विश्वयुद्धमा आधारित थ्रिलर चलचित्रबाट सुरु भएको हो। इल्या लेबेदेभ र निकिता भिसोत्स्कीले सह–निर्देशन गरेको यस चलचित्रले सोभियत प्रतिउपगुप्तचर निकायले रातो सेनामाथि सम्भावित पछाडिबाट हुने आक्रमण रोक्न गरेको प्रयासलाई चित्रण गर्छ।

अन्य प्रदर्शन हुने चलचित्रहरूमा क्लिम शिपेन्कोले निर्देशन गरेको अन्तरिक्षमै खिचिएको पहिलो चलचित्र द च्यालेन्ज; माक्सिम भोल्कोभको साहसिक पारिवारिक चलचित्र द डिनो फ्यामिली; र इभानोभा अलेक्जान्द्राले निर्देशन गरेको विद्यालयमा हुने दुव्र्यवहारबारे केन्द्रित अल रङ्ग गर्ल समावेश छन्।

सबै चलचित्रहरू रूसी हाउसमा निःशुल्क प्रदर्शन गरिनेछ।

The post काठमाडौंमा ‘रसियन फिल्म डेज’ उद्घाटन, अन्तरिक्षमै खिचिएको पहिलो चलचित्र प्रदर्शन first appeared on

क्याम्ब्रिज, म्यासाचुसेट्स, चैत २० ।  एमआईटीका अनुसन्धानकर्ताहरूले न्यूयोर्क सिटीमा गरिएको अध्ययनले विद्यमान सेन्सर र मोबाइल डेटाको प्रयोग गरेर सवारीसाधनबाट निस्कने प्रदूषणको उच्च-रिजोल्युसन नक्सा वास्तविक समयमा तयार गर्न सकिने देखाएको छ। यसले स्थानीय यातायात नीति र कार्बन घटाउने रणनीतिहरू बनाउन सहयोग पुर्‍याउने अपेक्षा गरिएको छ।

नयाँ विधिले परम्परागत नमुना-आधारित अध्ययनभन्दा धेरै विस्तृत तथ्याङ्क उत्पादन गर्छ। यसले शहरव्यापी प्रदूषण सूची र व्यक्तिगत सवारीसाधन-आधारित सूक्ष्म विश्लेषणबीचको खाडललाई पुल गर्ने काम गरेको अनुसन्धानकर्ताहरू बताउँछन्।

“हाम्रो मोडेलले वास्तविक समय ट्राफिक क्यामेरा र विभिन्न डाटा स्रोतलाई संयोजन गरेर एकल सडक र घण्टासम्मको विस्तृत उत्सर्जन नक्सा बनाउन सक्छ,” एमआईटी सेन्सेबल सिटी ल्याबका प्रमुख अनुसन्धान वैज्ञानिक पाओलो सान्तीले भने।

ल्याब निर्देशक कार्लो रत्तीले भने, “हामीले विभिन्न डाटा प्रवाहलाई एकीकृत गरेर केही वर्षअघि कल्पना गर्न नसक्ने स्तरको सूक्ष्मता हासिल गरेका छौं। यसले नीति निर्मातालाई मानव स्वास्थ्य जोगाउन शक्तिशाली उपकरण दिन्छ।”

अध्ययनमा म्यानहट्टनका ३३१ ट्राफिक क्यामेराबाट प्राप्त तस्बिर र १७.५ लाख मोबाइल फोनको स्थान डाटा प्रयोग गरिएको थियो। यसले सवारीसाधनलाई ९३ प्रतिशतसम्म सही वर्गीकरण गर्न सफल भएको अनुसन्धानकर्ताहरूले जनाएका छन्।

अनुसन्धानले विभिन्न परिदृश्यमा उत्सर्जनमा हुने परिवर्तन पनि परीक्षण गर्‍यो। निजी सवारीको मागलाई बसतर्फ मोड्दा वा व्यस्त समयलाई फैलाउँदा उत्सर्जनमा उल्लेखनीय कमी हुने देखिएको छ।

यस्तै, २०२५ जनवरीमा न्यूयोर्क सिटीले लागू गरेको ‘कन्जेसन प्राइसिङ’ कार्यक्रमले दक्षिण म्यानहट्टनमा ट्राफिक करिब १० प्रतिशत घटाएको थियो। यसले उत्सर्जनमा १६–२२ प्रतिशतसम्म कमी ल्याएको अध्ययनले देखाएको छ। 

अनुसन्धान नेचर सस्टनवेलिटी जर्नलमा प्रकाशित गरेको छ। यसले भविष्यमा शहरहरूलाई सस्तो र व्यावहारिक तरिकाले प्रदूषण नियन्त्रण नीतिहरू बनाउन सहयोग पुर्‍याउने अपेक्षा गरिएको छ।

The post एमआईटीको नयाँ अध्ययनले सवारी प्रदूषणको वास्तविक समय नक्सा सम्भव first appeared on

काठमाडौँ, चैत २० । करिब पाँच दशकपछि नासाको मिशनमा रहेका अन्तरिक्ष यात्रीहरू चन्द्रमाको वरिपरि उडान भर्न लागेका छन्। ओरियन यानको मुख्य इन्जिनले सफलतापूर्वक “ट्रान्सलुनार इन्जेक्सन बर्न” पूरा गरेपछि उनीहरू पृथ्वीको कक्षाबाट मुक्त भई चन्द्रमातर्फको यात्रामा निस्किएका हुन्।

नासाका अन्तरिक्ष यात्री रीड विस्मान, भिक्टर ग्लोभर, क्रिस्टिना कोच, र क्यानाडियन अन्तरिक्ष एजेन्सीका जेरेमी ह्यान्सनलाई बोकेको ओरियन यान अप्रिल १ मा फ्लोरिडास्थित केनेडी स्पेस सेन्टरबाट प्रक्षेपण गरिएको थियो। यो १० दिन लामो परीक्षण उडान अन्तर्गत चन्द्रमाको वरिपरि घुमेर पुनः पृथ्वीमा फर्किने योजना छ।

नासाका अधिकारी डा. लोरी ग्लेजले भने, “अपोलो १७ पछि पहिलो पटक मानव पृथ्वीको कक्षाबाट बाहिरिएका छन्। यो आर्टेमिस कार्यक्रमको महत्वपूर्ण उपलब्धि हो।”

उडानको क्रममा ओरियनले सौर्य पङ्खा फैलाएर ऊर्जा सङ्कलन गरेको छ। चालक दलले प्रणाली परीक्षण, म्यानुअल पाइलटिङ प्रदर्शन, र अन्तरिक्ष वातावरणमा अनुकूलन जस्ता कार्य सम्पन्न गरिसकेका छन्।

अप्रिल ६ मा हुने योजनाबद्ध चन्द्र उडानमा उनीहरूले उच्च-रिजोल्युसन तस्बिर खिच्नेछन् र चन्द्र सतहबारे प्रत्यक्ष अवलोकन गर्नेछन्। सफलतापूर्वक मिसन पूरा भएपछि उनीहरू प्रशान्त महासागरमा अवतरण गर्नेछन्।

नासाले आर्टेमिस कार्यक्रममार्फत भविष्यमा अझ चुनौतीपूर्ण मिसनहरू पठाउने योजना बनाएको छ, जसले चन्द्रमा र अन्ततः मंगल ग्रहमा मानव मिसनको आधार तयार गर्नेछ।

The post नासाका अन्तरिक्ष यात्रीहरू चन्द्रमातर्फ first appeared on

जेनेभा, चैत १९ । चिली औपचारिक रूपमा युरोपेली आणविक अनुसन्धान संगठन (सर्न) को सहयोगी सदस्य राष्ट्र बनेको छ। यो दर्जा २०२५ मेमा सदस्यता सम्झौता अनुमोदन र सर्नका विशेषाधिकार तथा उन्मुक्ति सम्बन्धी प्रोटोकलमा चिलीको प्रवेशपछि लागू भएको हो।

नयाँ दर्जाले चिलीलाई सर्न परिषद्, वित्त समिति र वैज्ञानिक नीतिगत समितिमा प्रतिनिधित्व गर्ने अधिकार दिएको छ।

सर्न र चिलीबीचको सहकार्य १९९१ मा सुरु भएको हो। त्यसयता चिलीका विश्वविद्यालय र अनुसन्धान संस्थानहरूले एटलास, सीएमएस, एलएचसीबी, एसएनडी याड एलएचसी, एनए ६४, सीप तथा एजील्ड सुविधा लगायतका परियोजनामा योगदान दिएका छन्।

अधिकारीहरुका अनुसार सदस्यता सर्न र चिली बीचको सम्बन्धलाई अझ गहिरो बनाउनेछ। यसले चिलीका नागरिकलाई सर्नमा सीमित अवधिका कर्मचारी पद र स्नातक कार्यक्रमहरूमा आवेदन दिन अवसर दिनेछ भने चिलीका कम्पनीहरूले सर्नका ठेक्का प्रमक्रियामा सहभागी हुन सक्नेछन्। 

यसले सर्नको आपूर्तिकर्ता आधारलाई बलियो बनाउने र चिलीको उद्योग तथा प्रविधि क्षेत्रमा योगदान पुर्‍याउने अपेक्षा गरिएको छ।

The post ‘सर्न’को सहयोगी सदस्य राष्ट्रमा चिली सामेल first appeared on

फ्लोरिडा, चैत १९ । नासाको एर्टेमिस–२ मिसन बुधबार साँझ प्रक्षेपण भएको छ, जसले अपोलो युगपछि पहिलो पटक मानवलाई चन्द्रमाको परिक्रमा गर्न पठाएको छ।

स्पेस लञ्च सिस्टम (एसएलएस) रकेट साँझ इस्टर्न डे लाइट टाइम ६:३५ बजे फ्लोरिडाको केनेडी स्पेस सेन्टरको ‘लञ्च प्याड ३९ बी’ बाट उडान भरी, ओरियन स्पेसक्राफ्टमा रहेका चार अन्तरिक्ष यात्रीलाई करिब १० दिन लामो परीक्षण यात्रामा पठाएको हो।

कमाण्डर रिड विसम्यान, पाइलट भिक्टर ग्लोभर, मिशन स्पेसलिस्ट क्रिस्टिना कोच, र क्यानाडियन अन्तरिक्ष यात्री जेरेमी ह्यान्सनले ओरियनका प्रणालीहरू परीक्षण गर्दै भविष्यका चन्द्र अवतरण र मंगल ग्रह यात्राको तयारी गर्नेछन्।

“एर्टेमिस–२ परीक्षण उडान हो, र परीक्षण अहिले मात्र सुरु भएको छ,” नासा सहयोगी प्रशासक अमित क्षत्रियाले भने, “आगामी १० दिनमा टोलीले ओरियनलाई परिक्षण गर्नेछ ताकि भविष्यका मिशनहरू आत्मविश्वासका साथ चन्द्र सतहमा पुग्न सकून्।”

उडानपछि ओरियनले सौर्य प्यानलहरू फैलाएर ऊर्जा संकलन सुरु गरेको छ। “इन्टीग्रेटी” नाम दिइएको स्पेसक्राफ्ट उच्च पृथ्वी कक्षमा प्रवेश गर्नेछ, त्यसपछि योजनाबद्ध इन्जिन फायरिङले यसलाई चन्द्र परिक्रमा मार्गमा पठाउने बताइएको छ ।

अप्रिल ६ मा हुने बहु-घण्टे चन्द्र परिक्रमा क्रममा टोलीले चन्द्रमाको टाढा भागका तस्वीर र अवलोकन गर्नेछ। त्यसपछि उनीहरू प्रशान्त महासागरमा सुरक्षित अवतरण गर्नेछन्।

यो नासाको एर्टेमिस कार्यक्रमअन्तर्गत पहिलो मानवयुक्त उडान हो । यस यानको उद्देश्य चन्द्रमामा दीर्घकालीन उपस्थितिको आधार तयार गर्नु र मंगल ग्रहमा मानव पठाउने तयारी गर्नु हो भनिएको छ । 

The post नासा एर्टेमिस–२ मार्फत् ५० वर्षपछि पहिलो मानवयुक्त चन्द्र परिक्रमा यात्रा सुरु first appeared on

काठमाडौं, चैत १९। प्रधानमन्त्री तथा मन्त्रिपरिषद्को कार्यालयले सार्वजनिक खरिदसम्बन्धी सूचनाहरू केवल सरकारी स्वामित्वका सञ्चार माध्यममार्फत मात्र प्रकाशन तथा प्रसारण गर्न दिएको निर्देशनले प्रेस स्वतन्त्रता र सूचनाको अधिकारमाथि गम्भीर प्रश्न उठाएको छ ।

चैत १८ गतेको निर्णयअनुसार जारी गरिएको उक्त पत्रले निजी तथा स्वतन्त्र सञ्चार माध्यमहरूलाई सरकारी सूचना तथा विज्ञापनबाट वञ्चित गर्ने संकेत गरेको भन्दै नेपाल पत्रकार महासंघ काठमाडौं शाखाले आपत्ति जनाएको छ ।

काठमाडौं शाखाले उक्त निर्णयलाई “ठाडो, असह्य र निन्दनीय हस्तक्षेप” को संज्ञा दिँदै यसले निजी सञ्चार माध्यमको आर्थिक आधार कमजोर पार्ने मात्र नभई दीर्घकालीन रूपमा तिनको अस्तित्वनै संकटमा पर्ने भन्दै चिन्ता व्यक्त गरेको छ ।

शाखाका सचिव रमेश कुमार बोहोराले प्रेस विज्ञाप्ति प्रकाशित गर्दै सरकारी सूचना र विज्ञापन निजी मिडियाका लागि प्रमुख आम्दानीको स्रोत भएको अवस्थामा यसलाई सीमित गर्नु योजनाबद्ध रूपमा स्वतन्त्र मिडियालाई नियन्त्रणमा राख्ने रणनीति भएको समेत विज्ञाप्तिमा उल्लेख गरेको छ । 

विज्ञप्तिमा भनिएको छ, ‘यस्तो व्यवस्था लागू भएमा राज्य सञ्चालित सञ्चार माध्यमहरूलाई अनुचित लाभ पुग्नेछ भने प्रतिस्पर्धात्मक वातावरण खलबलिनेछ । यसले बहुलवादी सञ्चार प्रणालीलाई कमजोर बनाउँदै एकतर्फी सूचना प्रवाहको जोखिम बढाउने छ । साथै, सरकारप्रति आलोचनात्मक दृष्टिकोण राख्ने स्वतन्त्र सञ्चार माध्यमहरूलाई आर्थिक रूपमा दबाबमा पारेर आत्मनियन्त्रण गर्न बाध्य पार्ने खतरा समेत औंल्याइएको छ ।’

संविधानले प्रत्याभूत गरेको अभिव्यक्ति स्वतन्त्रता र सूचनाको अधिकारको मर्मविपरीत देखिएको यो निर्णयले लोकतान्त्रिक अभ्यासमा प्रतिकूल प्रभाव पार्ने भन्दै शाखाले सरकारलाई पुनर्विचार गर्न माग गरेका छन् । पत्रकार महासंघ काठमाडौं शाखाले निर्णय तत्काल फिर्ता नलिए आन्दोलनका कार्यक्रम घोषणा गर्ने चेतावनी दिँदै देशभरका पत्रकारहरू प्रतिरोधमा उत्रिने समेत विज्ञप्तिमा उल्लेख गरेको छ ।

यसबीच, कानुनी तथा नीतिगत हिसाबले पनि उक्त निर्णय विवादास्पद देखिएको छ । सार्वजनिक खरिदसम्बन्धी सूचना पारदर्शी र प्रतिस्पर्धात्मक ढंगले व्यापक रूपमा प्रवाह हुनुपर्ने प्रावधान विपरीत सीमित माध्यममार्फत मात्र प्रकाशन गर्न खोज्नुले पारदर्शिता र सुशासनमाथि प्रश्न उठाएको काठमाडौं शाखाले उल्लेख गरेको  छ ।

The post सरकारी सूचनामा एकाधिकारको प्रयास: पत्रकार महासंघ काठमाडौं शाखाको आपत्ति first appeared on

काठमाडौं, चैत १९ । इटालियन प्रिमियम मोटरसाइकल ब्रान्ड मोर्बिडेली नेपाली बजारमा आधिकारिक रूपमा प्रवेश गरेको छ। कम्पनीले विभिन्न भेरियन्टका मोडेल सार्वजनिक गर्दै मूल्य सूची समेत सार्वजनिक गरेको छ।

मोर्बिडेली टी ५०२ एक्सको मूल्य १३ लाख ४९ हजार रुपैयाँ तोकिएको छ भने एफ ३५२ र टी ३५२ एक्सको मूल्य ९ लाख ९६ हजार ९०० रुपैयाँ निर्धारण गरिएको छ। त्यस्तै, टी १००२ भीएक्स ४४ लाख ९९ हजार ९०० रुपैयाँमा उपलब्ध हुनेछ भने सी २५२ भी ९ लाख ६९ हजार ९०० रुपैयाँमा बजारमा आएको छ।

काठमाडौंको नक्सालमा नयाँ शोरूम सञ्चालनमा ल्याइएको छ, जहाँ ग्राहकहरूले प्रिमियम मोटरसाइकलको अनुभव लिन सक्नेछन्। साथै, कम्पनीले हाल तिनकुनेमा सर्भिस सेन्टर सुविधा उपलब्ध गराइरहेको छ र निकट भविष्यमा उत्तरढोकामा थप सर्भिस सेन्टर विस्तार गर्ने योजना रहेको जनाएको छ।

प्रिमियम डिजाइन, शक्तिशाली इन्जिन र रेसिङ हेरिटेजका लागि परिचित मोर्बिडेलीले नेपाली बजारमा उच्चस्तरीय राइडिङ अनुभव दिने विश्वास कम्पनीले व्यक्त गरेको छ।

करिब पाँच दशक लामो अनुभव बोकेको वैद्य अर्गनाइजेशनले यसअघि प्रिमियम इलेक्ट्रिक स्कुटर ब्रान्ड अथर नेपाली बजारमा भित्र्याएर उल्लेखनीय सफलता हासिल गरिसकेको थियो। यसपटक मोर्बिडेलीमार्फत कम्पनीले अटोमोबाइल क्षेत्रमा आफ्नो उपस्थितिलाई अझ मजबुत बनाउने लक्ष्य लिएको छ।

The post नक्सालमा मोर्बिडेली शोरूम, नेपाली ग्राहकका लागि नयाँ अनुभव first appeared on

काठमाडौं, चैत १७ । नेवा: समुदायको परम्परागत बाँसुरीलाई आधुनिकतासँग जोड्ने उद्देश्यले राजधानीको ‘हङ्ग्री म्युजिसियन टेरेस’मा आज भव्य कार्यशाला सम्पन्न भएको छ। साउन्डबज अडियो ल्याब र नेपाल इको प्यानलको संयुक्त आयोजनामा भएको कार्यक्रममा रैथाने शिल्प र आधुनिक सामग्रीको संयोजनलाई विशेष महत्त्व दिइएको थियो।

नेपाल इको प्यानलका प्रमुख कार्यकारी अधिकृत इन्जिनियर कृष्णभक्त दुवालले भक्तपुरको दीर्घकालीन पर्यटन प्रवर्द्धनमा यस्ता कार्यक्रमले महत्त्वपूर्ण योगदान पुर्‍याउने विश्वास व्यक्त गरे । उनले पर्यटनलाई विकासको आधार मान्दै सांस्कृतिक गतिविधिलाई अझ प्रोत्साहन दिनुपर्ने आवश्यकता औँल्याए ।
साउन्डबज अडियो ल्याबका संस्थापक चन्दन ताम्रकारले परम्परागत बाँसुरीलाई जीवित राख्न कलाकारहरूको भूमिका महत्त्वपूर्ण हुने बताए। उनका अनुसार, हाल काठको बाँसुरीको स्थान पि भिसी पाइपबाट बनेका बाँसुरीले लिन थालेका छन्। “भारतबाट आयातमा निर्भर हुनु भन्दा आफ्नै युवालाई दक्ष बनाएर आत्मनिर्भर बनाउनुपर्छ,” ताम्रकारले जोड दिए।
कार्यशालामा बहु–वाद्यवादक तथा बाँसुरीमा दक्ष कलाकार अमन मालीले प्रशिक्षण दिएका थिए । कुमा सागर एन्ड द ख्वप ब्यान्डका सदस्य माली शास्त्रीय, लोक तथा ज्याज फ्युजन संगीतमा विशेष पहिचान बनाउन सफल कलाकार मानिन्छ ।

कार्यशालामा बाँसुरी निर्माणका प्राविधिक तरिका, स्वर र ताल मिलाउने, ट्युनिङ ज्ञान बाँस तथा पि भिसी पाइपबाट बाँसुरी बनाउने प्रविधि र हावाबाट बज्ने वाद्ययन्त्रका आधारभूत सिद्धान्तलगायतका  सिकाइका मुख्य विषयहरू थिए । 
कार्यशालामा कुमा सागर एन्ड द ख्वप ब्यान्डका सदस्यहरू सहित सुमन गैडा, अमन बज्राचार्य, र उजन शाक्यले सक्रिय सहभागिता जनाएका थिए। आयोजकहरूले यसलाई नयाँ पुस्ताका बाँसुरी निर्माताहरू जन्माउने अवसरका रूपमा लिएका छन्।
“ज्ञान बाँड्नका लागि हो” भन्ने सन्देशसहित सम्पन्न कार्यशालाले नेवारी संस्कृतिको संरक्षण र दिगो पर्यटन प्रवर्द्धनमा टेवा पुग्ने अपेक्षा गरिएको छ।

The post काठमाडौंमा बाँसुरी निर्माण कार्यशाला सम्पन्न first appeared on

काठमाडौं, चैत १६ । नेपाल उद्योग वाणिज्य महासंघ (एफएनसीसीआई) को आसन्न निर्वाचनमा उपाध्यक्षका उम्मेदवार नरेशलाल श्रेष्ठ समूहले आफ्नो विस्तारित उम्मेदवारी घोषणा गरेको छ।

आज राजधानीमा आयोजित घोषणा सभामा श्रेष्ठले आफ्ना १७ जनाको समूहसहित उम्मेदवारी सार्वजनिक गरेका हुन्।

श्रेष्ठले भने, “हाम्रो समूहले विभिन्न क्षेत्रलाई प्रतिनिधित्व गर्ने गरी उम्मेदवारी दिएको छ। यसले महासंघलाई अझै समावेशी र प्रभावकारी बनाउन मद्दत गर्नेछ।”

उनले आफ्नो समूहमा कृषि, पर्यटन, निर्यात, पुँजी बजार, खाद्यान्न, सूचना प्रविधि, घरजग्गा व्यवसाय र जलविद्युतलगायतका क्षेत्रलाई समावेश गरिएको जानकारी दिए।

श्रेष्ठ समूहले वरिष्ठ उपाध्यक्ष पदमा हेमराज ढकाललाई प्रस्ताव गरेको छ भने महिला तर्फ उपाध्यक्ष पदमा कमला श्रेष्ठलाई अघि सारेको छ।

यसैगरी सदस्य पदमा संघको तर्फबाट कमला श्रेष्ठ, भक्तबहादुर हमाल, सुबोधकुमार गुप्ता, लिलेन्द्र प्रधान, पशुपतिदेव पाण्डे, हरिबहादुर कार्की, राजेन्द्र सङ्ग्रौला, दुर्गाप्रसाद सुवेदी, नीराजनबहादुर चलाउने, सागर ढकाल, कृष्णभक्त श्रेष्ठ, विदुर धमला, सुरज बन्जाडे र विप्लव अधिकारी रहेका छन्।

महासंघको तर्फबाट प्रतिनिधित्व गर्दै सदस्य पदमा सुनैना घिमिरे पाण्डे र सुधीर पराजुलीलाई प्रस्ताव गरिएको छ।

यससँगै आगामी निर्वाचनमा विभिन्न समूहले आफ्नो उम्मेदवारी सार्वजनिक गर्दै महासंघको नेतृत्वमा योगदान गर्ने तयारी गरेका छन्।

The post उद्योग वाणिज्य महासंघको आसन्न निर्वाचनमा नरेशलाल श्रेष्ठ समूहको विस्तारित उम्मेदवारी घोषणा first appeared on