काठमाडौं । ग्लोबल आइएमई बैंकले आर्थिक वर्ष २०८१/८२ मा सवा ६ अर्ब रुपैयाँ खुद नाफा कमाएको छ।
बैंकले बुधवार सार्वजनिक गरेको चौथो त्रैमासिक वित्तीय विवरणअनुसार, उक्त अवधिमा बैंकको खुद नाफा ६ अर्ब २० करोड ४७ लाख रुपैयाँ पुगेको हो। यो अघिल्लो वर्षको तुलनामा १.०९ प्रतिशतले मात्र वृद्धि हो। अघिल्लो वर्ष बैंकले ६ अर्ब १३ करोड ७४ लाख रुपैयाँ नाफा कमाएको थियो।
बैंकले सो अवधिमा १६ अर्ब ७१ करोड २२ लाख रुपैयाँ खुद ब्याज आम्दानी गरेको छ, जुन अघिल्लो वर्षको तुलनामा ०.८५ प्रतिशतले घटेको हो। अघिल्लो वर्ष यो आम्दानी १६ अर्ब ८५ करोड ६३ लाख रुपैयाँ थियो।
संचालन नाफा पनि घट्दै ८ अर्ब ७७ करोड ५ लाख रुपैयाँमा सीमित भएको छ, जुन अघिल्लो वर्षको तुलनामा ३.०१ प्रतिशतले कम हो। बैंकको वितरणयोग्य नाफा ५ अर्ब ३७ करोड ९३ लाख रुपैयाँ रहेको छ।
हाल बैंकको चुक्त पुँजी ३८ अर्ब ११ करोड रुपैयाँ छ। यस आधारमा बैंकले १४.११ प्रतिशत लाभांश वितरण गर्न सक्ने क्षमता बनाएको छ। जगेडा कोषमा बैंकले २४ अर्ब २१ करोड रुपैयाँ राखेको छ।
बैंकको प्रतिसेयर आम्दानी (इपिएस) १६.२८ रुपैयाँ र प्रतिसेयर नेटवर्थ १७७.६३ रुपैयाँ रहेको छ। तर, खराब कर्जा दर ४.८७ प्रतिशत पुगेको छ, जुन अघिल्लो वर्षको तुलनामा वृद्धि हो।
बैंकको व्यवसाय भने दोहोरो अंकले बढेको छ। निक्षेप संकलन १२.९५ प्रतिशतले बढेर ५ खर्ब ५० अर्ब ६२ करोड रुपैयाँ पुगेको छ। कर्जा लगानी पनि ११.४६ प्रतिशतले वृद्धि भई ४ खर्ब ११ अर्ब ७९ करोड रुपैयाँ पुगेको छ।
Leave a Reply