काठमाडौ । नेपाल बैंक लिमिटेडले आर्थिक वर्ष २०८१/८२ मा चामत्कारिक नाफा वृद्धि हासिल गरेको छ।
बिहीबार सार्वजनिक गरिएको चौथो त्रैमासिक वित्तीय विवरणअनुसार, बैंकको वार्षिक नाफा अघिल्लो वर्षको तुलनामा १३२.७५ गुणा बढेर ३ अर्ब ७७ करोड ३० लाख रुपैयाँ पुगेको छ। अघिल्लो वर्ष बैंकले २ करोड ८४ लाख रुपैयाँ मात्र नाफा कमाएको थियो।
ब्याज आम्दानी, सञ्चालन नाफा र इम्पेयरमेन्ट चार्ज
बैंकको खुद ब्याज आम्दानी १६.८२ प्रतिशतले बढेर १० अर्ब ८ करोड ७१ लाख रुपैयाँ पुगेको छ। सञ्चालन नाफामा ६९२.४३ प्रतिशतको अभूतपूर्व वृद्धि देखिएको छ, जसअनुसार यो वर्ष ५ अर्ब ४१ करोड ५८ लाख ८६ हजार रुपैयाँ कायम भएको छ। इम्पेयरमेन्ट चार्ज घटेर १ अर्ब १३ करोड ५५ लाख रुपैयाँमा झरेको छ, जुन अघिल्लो वर्ष ४ अर्ब ७५ करोड ५२ लाख रुपैयाँ थियो।
वितरणयोग्य नाफा ऋणात्मक, इपीएस र नेटवर्थमा सुधार
नाफामा उल्लेखनीय वृद्धि भए पनि वितरणयोग्य नाफा भने ४४ करोड ९० लाख रुपैयाँ ऋणात्मक देखिएको छ। हाल बैंकको प्रति शेयर आम्दानी (इपीएस) २५.६८ रुपैयाँ छ भने प्रति शेयर नेटवर्थ: २५९.८१ रुपैयाँ छ ।
खराब कर्जा र पूँजी संरचना
खराब कर्जा दर ४.४७ प्रतिशतमा पुगेको छ, जुन अघिल्लो वर्ष ४.३३ प्रतिशत थियो। साथै, चुक्ता पुँजी १४ अर्ब ६९ करोड ४० लाख रुपैयाँ
छ भने जगेडा कोष २३ अर्ब ४८ करोड २९ लाख रुपैयाँ रहेको छ ।
व्यवसाय विस्तारमा आक्रामक वृद्धि
बैंक व्यवसाय विस्तारमा पनि आक्रामक देखिएको छ । निक्षेप १७.२९ प्रतिशतले बढेर ३ खर्ब ३२ अर्ब २ करोड १० लाख रुपैयाँ पुगेको छ ।त्यस्तै, कर्जा लगानी १३.८९ प्रतिशतले बढेर २ खर्ब २१ अर्ब ७० करोड ३४ लाख रुपैयाँ पुगेको छ।
Leave a Reply