काठमाडौं। ग्लोबल आइएमई बैंक लिमिटेडले ‘युरो मनी अवार्ड फर एक्सलेन्स २०२५’ अन्तर्गत बेस्ट बैंक अवार्ड प्राप्त गर्दै अन्तर्राष्ट्रिय स्तरमा पुनः एकपटक आफ्नो उत्कृष्टता प्रमाणित गरेको छ। सन् १९९२ मा स्थापना गरिएको युरो मनी म्यागजिनद्वारा प्रदान गरिने यो अवार्ड बैंकिङ क्षेत्रको एक प्रतिष्ठित मान्यता हो।
ग्राहक सेवा, वित्तीय सुदृढता, सामाजिक उत्तरदायित्व, नवीन प्रविधिको प्रयोग, वातावरणीय तथा सुशासनका क्षेत्रमा गरिएको योगदान र उच्च कार्यसम्पादनका आधारमा ग्लोबल आइएमई बैंकलाई यो सम्मान प्रदान गरिएको हो।
युरो मनी म्यागजिन बैंकिङ क्षेत्रको गहिरो विश्लेषण र समालोचनाका लागि प्रसिद्ध छ, जसमा अनुभवी तथा ख्यातिप्राप्त वित्तीय विज्ञहरूको संलग्नता रहन्छ।
यो वर्षको अवार्डले गर्दा ग्लोबल आइएमई बैंक तेस्रो पटक युरो मनीको बेस्ट बैंक अवार्ड जित्न सफल भएको हो। यसअघि सन् २०२२ र २०२४ मा पनि बैंकले यही अवार्ड प्राप्त गरिसकेको थियो।
त्यसैगरी, ग्लोबल फाइनान्सको बेस्ट बैंक अवार्ड २०२४ र २०२५ तथा युरो मनी अवार्ड फर एक्सलेन्स २०२४ अन्तर्गत दुई विधामा नेपालकै उत्कृष्ट बैंकको रुपमा समेत बैंक सम्मानित भइसकेको छ।
ग्लोबल आइएमई बैंक देशभरका ७७ वटै जिल्लामा शाखा सञ्जाल विस्तार गरेको निजी क्षेत्रको पहिलो वाणिज्य बैंक हो। हाल बैंकसँग ३५२ शाखा कार्यालय, ३८४ एटिएम, १५५ शाखा रहित सेवा, ६८ एक्सटेन्सन तथा राजश्व संकलन काउन्टर र ३ वटा अन्तर्राष्ट्रिय प्रतिनिधि कार्यालयसहित १,००० भन्दा बढी सेवा केन्द्रहरू छन्।
बैंकले नेपाली नागरिकहरूलाई देशभित्र मात्र होइन, विदेशबाट पनि रेमिट्यान्स सेवा उपलब्ध गराउँदै आएको छ। संयुक्त राज्य अमेरिका, बेलायत, क्यानडा, अष्ट्रेलिया, मलेशिया, दक्षिण कोरिया, जापान, साउदी अरब, कतार, यूएई, बहराइन, कुवेत, भारत, जोर्डन लगायतका देशहरूबाट रेमिट्यान्स भित्र्याउने कार्यमा बैंक सक्रिय छ।
Leave a Reply