काठमाडौं । नेपाल पर्वतारोहण संघ (एनएमए)को नयाँ कार्यसमितिको निर्वाचनमा फुर गेल्जे शेर्पा अध्यक्ष पदमा विजयी भएका छन्।
उनले कुलबहादुर गुरुङलाई ५४ मतको अन्तरले पराजित गर्दै संघको नेतृत्व सम्हाल्ने अवसर प्राप्त गरेका हुन्। निर्वाचन समितिका अनुसार शेर्पाले ३४२ मत प्राप्त गर्दा गुरुङले २८८ मत पाएका थिए।
फुर गेल्जे शेर्पा नेकपा माओवादी केन्द्र र राष्ट्रिय स्वतन्त्र पार्टी (रास्वपा) निकट पर्यटन व्यवसायीहरूको साझा उम्मेदवार थिए, जबकि उनका प्रतिस्पर्धी गुरुङ नेपाली कांग्रेस र नेकपा एमाले निकट व्यवसायीहरूको तर्फबाट उम्मेदवार बनेका थिए।
वरिष्ठ उपाध्यक्षमा ईश्वरी पौडेल ३४५ मतसहित विजयी भए भने प्रथम उपाध्यक्षमा मिङ्मा ग्याबो शेर्पाले ३५९ मत प्राप्त गरे। द्वतीय उपाध्यक्षमा बोधराज भण्डारीले ३६८ मत ल्याएर जितेका छन्। महासचिव पदमा राजेन्द्रबहादुर लामा ३१८ मतसहित विजयी भए।
सचिव पदमा चन्दन थापा ३५८ मत ल्याएर विजयी भए भने कोषाध्यक्षमा ङिमा नुर्बु शेर्पा र सुमी लामाले समान ३०४ मत प्राप्त गरेपछि कार्यकाल आधा–आधा बाँड्ने सहमति भएको छ।
सदस्य पदमा माधवकुमार धमला, केदार न्यौपाने, थुप्देन शेर्पा, गोकुल थापा, मुलाल गुरुङ, देण्डी शेर्पा, विक्रम कार्की, रिञ्जे शेर्पा, देवेन्द्र डंगोल, दिकी शेर्पा र निशा भोटे विजयी भएका छन्।
नयाँ नेतृत्वले नेपालको पर्वतारोहण क्षेत्रको विकास, सुरक्षा, र अन्तर्राष्ट्रिय पहिचान सुदृढ गर्न महत्वपूर्ण भूमिका खेल्ने अपेक्षा गरिएको छ।
Leave a Reply