काठमाडौं — नेपाल बीमा प्राधिकरणले जीवन, निर्जीवन, लघु तथा पुनर्बीमा कम्पनीहरूको वित्तीय स्रोतको लगानीलाई सुरक्षित, विविधीकृत र नियमनसंगत बनाउने उद्देश्यले ‘बीमकको लगानी सम्बन्धी निर्देशन, २०८२’ जारी गरेको छ।
प्राधिकरणले भाद्र १७ गते, मङ्गलबार उक्त निर्देशन सार्वजनिक गरेको हो।
निर्देशनअनुसार, बीमकहरूले संचालक समितिबाट स्वीकृत ‘लगानी नीति’ लागू गर्नुपर्नेछ। यसले बीमकलाई सुरक्षित क्षेत्रमा लगानी गर्न प्रोत्साहन, विविध क्षेत्रमा लगानीको व्यवस्था, तरलता र दायित्व मिलान, तथा आन्तरिक नियन्त्रण र जोखिम व्यवस्थापन प्रणालीलाई प्रभावकारी बनाउने लक्ष्य राखेको छ।
निर्देशनका प्रमुख व्यवस्थाहरू:
(१) बीमकलाई सरकारी सुरक्षणपत्र र नेपाल राष्ट्र बैंकबाट जारी हुने ऋणपत्रमा लगानी गर्न कुनै प्रकारको बन्देज र सीमा लागू नहुने,
(२) जीवन, निर्जीवन तथा पुनर्बीमा व्यवसाय गर्ने बीमकले प्राधिकरणबाट पूर्वस्वीकृति लिएर कृषि उत्पादन, भण्डारण तथा वितरण, भण्डारण गृह तथा शीत भण्डारण गृह, ऊर्जा उत्पादन, प्रसारण तथा वितरण, शिक्षा तथा स्वास्थ्य र लगानी कम्पनी लगायतका क्षेत्रमा व्यवसाय गर्नका लागि कूल लगानीको बढीमा पाँच प्रतिशत रकमसम्म सहायक कम्पनीमा लगानी गर्नसक्ने,
(३) बीमकको संचालक समितिका अध्यक्ष वा सदस्य वा निजका एकाघरपरिवारका सदस्य सहायक कम्पनीको संचालक समितिको अध्यक्ष वा सदस्य वा व्यवस्थापकीय जिम्मेवारीमा नरहेको हुनुपर्ने,
(४) बीमक आफैले संस्थापना गर्ने सहायक कम्पनीमा लगानी गर्नका लागि प्राधिकरणबाट अन्तिम स्वीकृति प्राप्त गरेको मितिले एक महिनाभित्र लगानी गरिसक्नुपर्ने,
(५) सहायक कम्पनीले निष्काशन गर्ने कुनै पनि सुरक्षणपत्रहरु तथा उपकरणमा बीमकले लगानी गर्न नपाउने,
(६) बीमकले घरजग्गा व्यवसायमा रहेको लगानीको कम्तीमा प्रत्येक तीन वर्षमा एकपटक मूल्याङ्कन गर्नुपर्ने,
(७) बीमकले कूल लगानीका आधारमा कायम गर्नुपर्ने लगानीको सीमा प्रत्येक दिन कायम गर्नुपर्ने,
(८) बीमकले बैंक तथा वित्तीय संस्थामा लगानी गर्दा नेपाल राष्ट्र बैंकले तोकेको पूँजीकोष कायम गरेको हुनुपर्ने,
(९) बीमकले लगानी व्यवस्थापन गर्नका लागि लगानी सम्बन्धी कार्यको अनुभव भएको उच्च व्यवस्थापन तहको कर्मचारीको मातहतमा रहने गरी एक ॅलगानी व्यवस्थापन इकाई’ स्थापना गर्नुपर्ने,
(१०) बीमकले लगानी गर्दा बीमा सम्बन्धी दायित्वको अवधिलाई ख्यालगरी लगानी गर्नुपर्ने,
(११) जीवन बीमा व्यवसाय तथा लघुजीवन बीमा व्यवसाय गर्ने बीमकले आफ्नो प्रत्येक पोर्टफोलियोको जीवन बीमा कोष र उक्त पोर्टफोलियो अन्तर्गत प्राप्त प्रिमियम लगायतका अन्य आम्दानीबाट प्राप्त रकमको लगानी तथा सम्पत्तिको अलग अलग व्यवस्थापन गर्नुपर्ने,
(१२) बीमकले आफ्नो कोषमा रहेको रकममध्ये नेपाल राष्ट्र बैंकबाट इजाजतपत्रप्राप्त बैंक तथा वित्तीय संस्था र पूर्वाधार विकास बैंकको मुद्दति निक्षेपमा लगानी गरेको रकम प्राधिकरणको नाममा एअरमार्क गर्नुपर्ने,
(१३) बीमकले प्रत्येक त्रैमास समाप्त भएको सात दिनभित्र लगानीको विवरण क्ष्च्ःक्ष्क् पोर्टल मार्फत प्राधिकरणमा पेश गर्नुपर्नेछ ।
नेपाल बीमा प्राधिकरणले यो निर्देशनमार्फत बीमकहरूको लगानी अनुशासन, पारदर्शिता र दीर्घकालीन स्थायित्व सुनिश्चित गर्ने अपेक्षा गरेको छ। बीमकहरूले निर्देशनको पूर्ण पालना गर्नुपर्नेछ, अन्यथा नियामक कारबाहीको दायरामा पर्ने प्राधिकरणले स्पष्ट पारेको छ।
Leave a Reply