काठमाडौं — नेपाल बीमा प्राधिकरणले बीमा कम्पनीहरूले पुनर्बीमा, रेट्रोशेसन तथा विदेशबाट आयात गरिने परामर्श सेवाका लागि भुक्तानी गर्नुपर्ने विदेशी मुद्रा सटही सिफारिस प्रक्रिया पारदर्शी र व्यवस्थित बनाउन ‘बीमकको विदेशी मुद्रा सटही सिफारिस सम्बन्धी निर्देशन, २०८२’ जारी गरेको छ।
प्राधिकरणले सार्वजनिक गरेको निर्देशनमा विदेशी भुक्तानी प्रक्रिया सम्बन्धी ८ प्रमुख व्यवस्थाहरू समावेश छन्। निर्देशनले बीमकहरूलाई सिफारिसबिना विदेशी भुक्तानी नगर्न स्पष्ट रूपमा निर्देश गरेको छ।
निर्देशनका मुख्य बुँदाहरू यस प्रकार छन् ।
- पुनर्बीमा शुल्क, बीमा दाबी रकम, लाभांश फिर्ता तथा परामर्श सेवाको भुक्तानी सिधै वा बीमा दलालको संलग्नतामा भएमा प्राधिकरणको सिफारिस आवश्यक हुनेछ।
- बीमकहरूले विदेशी लगानीसँग सम्बन्धित प्रचलित कानून तथा नेपाल राष्ट्र बैंकको विनिमय व्यवस्थापनसम्बन्धी निर्देशन पालना गर्नुपर्नेछ।
- ट्रिटी पुनर्बीमा, रेट्रोशेसन तथा ऐच्छिक पुनर्बीमा सन्दर्भमा सिफारिस माग गर्दा तोकिएका कागजातहरू प्राधिकरणमा पेश गर्नुपर्नेछ।
- विदेशी बीमक वा ब्रोकरलाई बीमा दाबी वापतको भुक्तानी गर्दा हिसाब–किताब मिलानसहित आवश्यक कागजात संलग्न गर्नुपर्नेछ।
- बीमाङ्कीको पारिश्रमिक, विशेषज्ञ सेवा, क्रेडिट रेटिङ्ग, परामर्श सेवा, विदेशी सर्भेयरको पारिश्रमिक, सफ्टवेयर भुक्तानी तथा तेस्रो पक्ष सहजकर्ता सम्बन्धी भुक्तानीमा निर्देशनअनुसार कागजात संलग्न गर्नुपर्नेछ।
- सिफारिस केवल सूचीकरण भएका विदेशी पुनर्बीमक तथा दलालहरू र निर्देशिकाबमोजिमको रेटिङ्ग प्राप्त संस्थाहरूका लागि मात्र गरिनेछ।
- सिफारिस माग गर्दा पेश गरिएका कागजात तथा स्वीकृतिपत्रहरू कम्तीमा पाँच वर्षसम्म सुरक्षित राख्नुपर्नेछ।
- बीमकहरूले विदेशी मुद्राको भुक्तानी विवरण प्रत्येक चौमास समाप्त भएको मितिले १५ दिनभित्र प्राधिकरणमा पेश गर्नुपर्नेछ।
नेपाल बीमा प्राधिकरणले यो निर्देशनमार्फत बीमा क्षेत्रको वित्तीय अनुशासन, पारदर्शिता र नियमनको प्रभावकारिता बढाउने अपेक्षा गरेको छ। बीमकहरूले निर्देशनको पूर्ण पालना गर्नुपर्नेछ, अन्यथा नियामक कारबाहीको दायरामा पर्ने प्राधिकरणले स्पष्ट पारेको छ।
Leave a Reply