हेनान, चीन । हेनान विश्वविद्यालय अफ टेक्नोलोजीका अनुसन्धानकर्ताहरूले प्रकाशित गरेको नयाँ अध्ययनले गहुँमा पाइने इन्जाइमहरूले परम्परागत रूपमा प्रयोग गरिने रासायनिक पदार्थको सट्टा रोटीको गुणस्तर सुधार गर्न सकिने देखाएको छ।
प्रोफेसर जिनशुई वाङको नेतृत्वमा गरिएको अनुसन्धानले चार प्रमुख इन्जाइमहरू सल्फहाइड्रिल अक्सिडेज (एसओएक्स), प्रोटिन डिसल्फाइड आइसोमरेज (पीडीआइI), एस्कोर्बेट अक्सिडेज (एएओ) र डिहाइड्रोएस्कोर्बेट रिडक्टेज (डीएचएआर) ले गहुँको ग्लुटेन संरचना मजबुत बनाउन महत्त्वपूर्ण भूमिका खेल्ने देखाएको हो। यी इन्जाइमहरूले आटा लचिलो, स्थिर र राम्रो ग्यास सम्हाल्ने बनाउँछन्, जुन रोटीको गुणस्तर सुधार गर्न आवश्यक हुन्छ।
“गहुँको आटाले लचिलोपन देखाउने क्षमता मुख्यतः ग्लुटेन प्रोटिनका कारण हो,” प्रोफेसर जिनशुई वाङले भने, “हामीले देखाएका छौं कि गहुँमा स्वाभाविक रूपमा पाइने इन्जाइमहरूले यी गुणहरू सुधार गर्न सक्छन्, जुन सुरक्षित र ‘क्लिन लेबल’ उत्पादनतर्फको प्रयाससँग मेल खान्छ।”
अन्य इन्जाइमहरू टाइरोसिनेज, लाक्केज र लिपोक्सिडेजलगायतले पनि प्रोटिन र पोलिसाकाराइडको क्रस-लिंकिंगमा योगदान पुर्याउँछन्, जसले रोटीको बनावट र आकार सुधार गर्नेछ।
अध्ययनले कृत्रिम बुद्धिमत्ता उपकरण ‘अल्फाफोल्ड२’ को प्रयोग गरेर औद्योगिक रोटी उत्पादनका लागि उपयुक्त इन्जाइम डिजाइन गर्न सकिने सम्भावना देखाएको छ।
सो अध्ययनका अनुसार प्राकृतिक सामग्रीप्रति उपभोक्ताको बढ्दो रुचि र सुरक्षित उत्पादन प्रक्रियाको मागलाई ध्यानमा राख्दै, यो अनुसन्धानले रासायनिक पदार्थको सट्टा गहुँको आफ्नै इन्जाइम प्रणाली प्रयोग गरेर उच्च गुणस्तरको रोटी उत्पादन गर्न वैज्ञानिक आधार प्रदान गरेको छ।
Leave a Reply