काठमाडौं – हुन्डाईको पूर्ण रूपमा विद्युतीय फ्ल्यागशिप एसयूभी, आयोनिक ९ ले जर्मन प्रिमियम कार अफ द इयर २०२६ को प्रतिष्ठित उपाधि जितेको छ।
बजारमा प्रवेश गरेको तीन महिनामै प्राप्त यो सम्मानले हुन्डाईको विश्वव्यापी प्रिमियम इलेक्ट्रिक सवारी क्षेत्रको द्रुत प्रगति र नवप्रवर्तन, डिजाइन तथा दिगो गतिशीलताप्रतिको प्रतिबद्धतालाई पुष्टि गरेको हुन्डाई जनाएको छ।
४० स्वतन्त्र मोटर पत्रकारहरूको निर्णायक मण्डलले आयोनिक ९ (IONIQ 9)लाई उत्कृष्ट डिजाइन, अत्याधुनिक ८००-भोल्ट फास्ट चार्जिङ प्रविधि, र तीन पंक्तिको आरामदायक तथा व्यक्तिगत अनुभव दिने इन्टेरियरका आधारमा विजेता घोषित गरेको हो। निर्णायकहरूले यसको प्रविधि, स्थानको उपयोग, र मानव-केंद्रित सुविधाहरूको प्रशंसा गरेका छन्।
“आयोनिक ९ नवप्रवर्तनशील डिजाइन, प्रगतिशील सोच र दिगो गतिशीलताप्रतिको प्रतिबद्धताको ब्रान्ड हो,” हुन्डाई मोटर युरोपका अध्यक्ष तथा सीईओ जेभियर मार्टिनेटले भने। “यस्ता पुरस्कारहरूले हामी सही बाटोमा छौं भन्ने पुष्टि गर्छन् र अझ प्रेरणादायी विद्युतीय सवारी निर्माण गर्न हामीलाई हौसला दिन्छन्।”
हुन्डाईको इलेक्ट्रिक ग्लोबल मोड्युलर प्लेटफर्म (E-GMP) मा आधारित आयोनिक ९ ले १० देखि ८० प्रतिशतसम्मको चार्ज २४ मिनेटमै पूरा गर्न सक्छ। यसले ५ सय किलोमिटरभन्दा बढीको ड्राइभिङ रेन्ज (WLTP अनुसार) प्रदान गर्छ। यसमा एआई-सहयोगयुक्त भ्वाइस रिकग्निशन, नयाँ पुस्ताको कनेक्टिभिटी र वातावरणमैत्री सामग्रीहरू समावेश छन्।
यो अन्तर्राष्ट्रिय सफलता हुन्डाई नेपालको विद्युतीय सवारी प्रवर्द्धन अभियानसँग पनि मेल खान्छ। कोना ईभी र आयोनिक ५ जस्ता मोडेलहरू नेपाली बजारमा अग्रणी छन् भने लक्ष्मी इन्टरकन्टिनेन्टल प्रा.लि. मार्फत स्थानीय असेंबली क्षमताले विश्वस्तरीय ईभीहरू नेपाली उपभोक्तासम्म पुर्याउने प्रयासलाई सशक्त बनाएको छ।
जर्मन कार अफ द इयर (GCOTY) युरोपको सबैभन्दा प्रतिष्ठित अटोमोबाइल पुरस्कारमध्ये एक हो। हरेक वर्ष कम्प्याक्ट, प्रिमियम, लक्जरी, न्यू एनर्जी र परफर्मेन्स जस्ता पाँच श्रेणीमा नयाँ सवारीहरूको डिजाइन, प्रविधि, दक्षता र नवप्रवर्तनका आधारमा मूल्याङ्कन गरिन्छ।
प्रिमियम श्रेणीमा आयोनिक ९ को जितले हुन्डाईको विद्युतीय गतिशीलतामा विश्व नेतृत्व र प्रिमियम ईभीको परिभाषा पुनःनिर्धारण गर्ने प्रतिबद्धतालाई उजागर गरेको हुन्डाईले जनाएको छ।
Leave a Reply