महोत्तरी । महोत्तरीको बर्दिबासस्थित ज्योति विकास बैंक क्षेत्रीय कार्यालयका दुई कर्मचारीमाथि सप्तकोशी इन्टिग्रेटेड एग्रो फर्म प्रा.लि.का सञ्चालक तथा सहयोगीहरूले नियोजित रूपमा आक्रमण गरेको घटनाप्रति बैंकले गम्भीर ध्यानाकर्षण गराएको छ।
बैंकका अनुसार, रुपनी शाखाका ऋणीसँग कर्जाको किस्ता नियमित गर्ने विषयमा छलफल गर्न कर्मचारीहरू फर्मको कार्यालय पुगेका थिए। तर छलफलका क्रममा सञ्चालक, उनका परिवारका सदस्य तथा सहयोगीहरूले कर्मचारीहरूलाई नियन्त्रणमा लिई दुर्व्यवहार गर्दै ज्यानमार्ने उद्देश्यले आक्रमण गरेको बैंकले प्रेस विज्ञप्तिमा जनाएको छ।
घटनामा स्थानीय उपमेयरको समेत संलग्नता रहेको उल्लेख गर्दै बैंकले यसलाई अत्यन्त खेदजनक आपराधिक गतिविधि भनेको छ। कर्मचारीहरूलाई नियन्त्रणमा राखी धितो लिलामी स्थगनको निर्णय तत्कालै केन्द्रिय कार्यालयबाट पत्र उपलब्ध नगराएमा ज्यान लिने धम्की दिइएको र सुरक्षा निकायबाट सहयोग नपाएपछि बैंकलाई विकल्पविहीन अवस्थामा पत्र जारी गर्न बाध्य बनाइएको बैंकले जानकारी दिएको छ।
ज्योति विकास बैंक लिमिटेड नेपाल राष्ट्र बैंकको नियमनमा रहेर विभिन्न ऐन तथा नियमको पालना गर्दै बैंकिङ व्यवसाय सञ्चालन गर्ने राष्ट्रिय स्तरको विकास बैंक भएको उल्लेख गर्दै, सो व्यवसायिक दायित्व निर्वाह गर्ने क्रममा कर्मचारीमाथि भएको आक्रमणलाई बैंकले दुर्भाग्यपूर्ण भनेको छ।
पछिल्लो समय बैंक तथा वित्तीय संस्थाहरू विभिन्न अराजक तथा आपराधिक गतिविधिको निशानामा परिरहेको सन्दर्भमा यस घटनाले थप चिन्ता बढाएको बैंकले जनाएको छ। अपराधीहरूलाई कानुनी दायरामा ल्याई कडा भन्दा कडा कारबाहीको लागि आवश्यक कानुनी प्रक्रिया अघि बढाइसकेको र यस्ता आपराधिक मनसायका गतिविधिहरू विरुद्ध सदैव कडा रूपमा उभिने प्रतिबद्धता बैंकले व्यक्त गरेको छ।
Leave a Reply