एपीएस ग्लोबल फिजिक्स सम्मेलन सम्पन्न

काठमाडौं,  चैत ५, २०८२ । अमेरिकन फिजिकल सोसाइटी (एपीएस) को ग्लोबल फिजिक्स सम्मेलन बिहीबार नेपालमा सम्पन्न भएको छ। यस सम्मेलनले वैज्ञानिक, अनुसन्धानकर्ता तथा नीतिनिर्माताहरूलाई भौतिकशास्त्रमा भएका प्रगतिहरू र तिनको विश्वव्यापी चुनौतीहरू समाधानमा भूमिकाबारे छलफल गरेको छ ।

नेपाल फिजिकल सोसाइटी (एनपीसी) ले एपीएससँग सहकार्यमा आयोजना गरेको यस कार्यक्रमले नेपाल तथा विदेशका भौतिकशास्त्री, विद्यार्थी र नीतिनिर्माताहरूलाई अत्याधुनिक अनुसन्धानबारे छलफल र प्रस्तुतीकरणमा संलग्न गराउने उद्देश्य राखेको थियो।

काठमाडौंमा आयोजित सम्मेलनमा जलवायु विज्ञान, बायोमेडिकल फिजिक्स, मटरियल साइन्स तथा दिगो विकाससम्बन्धी सत्रहरू समावेश थिए। सहभागीहरूले ऊर्जा सुरक्षासहित जलवायु परिवर्तन जस्ता समस्याहरू समाधान गर्न अन्तर्राष्ट्रिय सहकार्य र अनुसन्धानमा लगानीको आवश्यकता औंल्याए।

भारतको जवाहरलाल नेहरू विश्वविद्यालयका डा. टी.भी. लक्ष्मी कुमारले ‘आर्कटिक एम्प्लिफिकेशन एण्ड क्लाइमेट चेन्ज’ विषयमा आफ्नो अनुसन्धान प्रस्तुत गर्दै नेपाली अनुसन्धानकर्ताहरूलाई जलवायु भौतिकशास्त्रमा संलग्न हुन आग्रह गरे। उनले यस क्षेत्रले नेपालमा ऊर्जा क्षेत्र सुदृढ गर्न र नयाँ अवसरहरु सिर्जना गर्न सक्ने बताए।

“यो सम्मेलन दोस्रो पटक नेपालमा आयोजना गरिएको हो, जसले अन्तर्राष्ट्रिय वैज्ञानिक संवादमा नेपालको बढ्दो भूमिकालाई उजागर गरेको छ,” नेपाल फिजिकल सोसाइटीका अध्यक्ष प्रा. डा. प्रदीप कुमार भट्टराईले भने।

त्रिभुवन विश्वविद्यालयका प्रा. डा. सिताराम ब्याहुतले नेपालमा भौतिकशास्त्रसम्बन्धी गतिविधिहरूको वर्तमान अवस्थाबारे जानकारी दिँदै एपीएससँगको सहकार्यले नेपालमा भौतिकशास्त्र शिक्षा सुधार गर्न महत्त्वपूर्ण भूमिका खेल्ने बताए।

सम्मेलनसँगै आयोजित ग्लोबल स्याटेलाइट कार्यक्रममा नेपालमा भएका विभिन्न अनुसन्धान गतिविधिहरू प्रस्तुत गर्ने नौ वटा प्रस्तुतीकरणहरू समावेश थिए।