काठमाडौं । सरकारी स्वामित्वको राष्ट्रिय वाणिज्य बैंकले आर्थिक वर्ष २०८१/८२ मा उल्लेखनीय नाफा वृद्धि हासिल गरेको छ।
बैंकले बिहीवार सार्वजनिक गरेको चौथो त्रैमासिक वित्तीय विवरणअनुसार, एक वर्षको अवधिमा खुद नाफा ४९.५३ प्रतिशतले बढेर ३ अर्ब ८१ करोड ६७ लाख रुपैयाँ पुगेको छ। अघिल्लो वर्ष यो नाफा २ अर्ब ५५ करोड २४ लाख रुपैयाँ थियो।
ब्याज आम्दानी र सञ्चालन नाफा
बैंकको खुद ब्याज आम्दानी ०.५२ प्रतिशतले बढेर १० अर्ब ८ करोड २४ लाख रुपैयाँ पुगेको छ। अघिल्लो वर्ष यो रकम १० अर्ब ३ करोड २ लाख रुपैयाँ थियो।
त्यस्तै, सञ्चालन नाफामा पनि ३१.५७ प्रतिशतको वृद्धि देखिएको छ, जसअनुसार यो वर्ष ५ अर्ब ३८ करोड २५ लाख रुपैयाँ कायम भएको छ।
लाभांश क्षमता र वितरणयोग्य मुनाफा
नाफा वृद्धिसँगै बैंकको लाभांश वितरण क्षमता भने कमजोर देखिएको छ। चालु वर्षमा बैंकले १.१४ प्रतिशत मात्र लाभांश वितरण गर्न सक्ने अनुमान गरिएको छ। वितरणयोग्य मुनाफा ३० करोड ३४ लाख रुपैयाँ रहेको छ, जबकि अघिल्लो वर्ष यो मुनाफा १ अर्ब २२ करोड रुपैयाँ ऋणात्मक थियो।
निक्षेप १६.५९ प्रतिशतले बढेर ५ खर्ब ४१ करोड ४६ लाख रुपैयाँ पुगेको छ। कर्जा लगानी १९.७८ प्रतिशतले बढेर २ खर्ब ९४ अर्ब १८ करोड रुपैयाँ पुगेको छ।
प्रति शेयर आम्दानी (इपीएस) हाल २४.४१ रुपैयाँ रहेको छ। खराब कर्जा दर अघिल्लो वर्षको ४.२८ प्रतिशतबाट घटेर ३.५९ प्रतिशतमा झरेको छ।
बैंकको चुक्ता पुँजी हाल १५ अर्ब ६३ करोड ७३ लाख रुपैयाँ रहेको छ। जगेडा कोषमा ३७ अर्ब ४७ करोड ५४ लाख रुपैयाँ राखिएको छ।
Leave a Reply