चितवन । राष्ट्रिय प्रकृति संरक्षण कोष (एनटीएनसी) ले राष्ट्रिय निकुञ्ज तथा वन्यजन्तु संरक्षण विभाग (डिएनपीडब्ल्यूसी) लाई फिल्ड गियर तथा उपकरणहरू हस्तान्तरण गरेको छ।
यो सहयोग अमेरिकी विदेश मन्त्रालयको अन्तर्राष्ट्रिय लागूपदार्थ तथा कानून प्रवर्तन मामिला ब्यूरो (आइएनएल) द्वारा नेपालमा वन्यजन्तु तस्करी विरुद्धको परियोजना अन्तर्गत गरिएको हो।
एनटीएनसीको जैविक विविधता संरक्षण केन्द्र, चितवनमा आयोजित औपचारिक कार्यक्रममा डिएनपीडब्ल्यूसीका महानिर्देशक डा. रामचन्द्र कँडेल, अमेरिकी दूतावासका उपप्रमुख जेसन पी. मिक्स तथा दक्षिण एसियाका लागि आइएनएल क्षेत्रीय निर्देशक मार्सी एस. ब्राउनको उपस्थिति रहेको थियो।
एनटीएनसीका अनुसार कुल ७ हजार १ सय २० फिल्ड गियर तथा उपकरणहरू हस्तान्तरण गरिएको थियो । जसमा मेडिकल किट, GPS यन्त्र, दूरबीन, क्यामेरा, सर्चलाइट, ट्याक्टिकल पाइन्ट, सर्ट, फिल्ड जुत्ता, झोला, स्विस चक्कु र हेड लाइटहरू समावेश थिए।
कार्यक्रममा बोल्दै अमेरिकी दूतावासका उपप्रमुख मिक्सले नेपालको जैविक विविधताको संरक्षणमा वन्यजन्तु अपराध विरुद्धको संघर्षको महत्व र यसमा अमेरिकी सरकारको निरन्तर प्रतिबद्धता उल्लेख गरे।
डिएनपीडब्ल्यूसीका महानिर्देशक डा. कँडेलले कठिन भूभाग र चुनौतीपूर्ण परिस्थितिमा कार्यरत अग्रमोर्चाका कर्मचारीहरूका लागि यो सहयोग अत्यन्त उपयोगी हुने बताए।
एनटीएनसीका सदस्य–सचिव डा. नरेश सुवेदीले नेपालस्थित अमेरिकी मिशन तथा विभिन्न अमेरिकी निकायहरूसँगको दीर्घकालीन र विश्वासिलो साझेदारीको प्रशंसा गरे।
एनटीएनसीका निर्देशक डा. चिरञ्जीवी पोखरेलले संस्थाका समग्र कार्यक्रमहरूको जानकारी गराए भने वरिष्ठ संरक्षण अधिकृत श्री अम्बिका प्रसाद खतिवडाले आइएनएल परियोजनाका गतिविधिहरूको विवरण प्रस्तुत गरे, जसअन्तर्गत ३ हजार १ सय ७५ जना सरकारी अग्रमोर्चा कर्मचारीहरूलाई तालिम दिइएको जनाएको छ ।
हस्तान्तरणसँगै चितवनको मिर्गाकुञ्ज सामुदायिक वन्यजन्तु अपराध नियन्त्रण इकाइलाई पनि ल्यापटप, क्यामेरा, जीपीएस, दूरबीन, सर्चलाइट, मेडिकल किट र वाकी–टकीको एक जोडी प्रदान गरिएको छ।
यो पहलले नेपालमा वन्यजन्तु संरक्षणमा कार्यरत कर्मचारीहरूको क्षमता अभिवृद्धि गर्दै देशको प्राकृतिक सम्पदाको सुरक्षा सुदृढ गर्ने विश्वास दिलाएको छ।
Leave a Reply