काठमाडौँ । नेपाल बीमा प्राधिकरणका अध्यक्ष जनक राज शर्माले शुक्रबारदेखि औपचारिक रूपमा कार्यभार सम्हालेका छन्।
शुक्रबार अर्थमन्त्री रामेश्वरप्रसाद खनालले अध्यक्ष शर्मालाई पद तथा गोपनीयताको शपथ गराएका थिए। नेपाल सरकारको मन्त्रिपरिषद्को २०८२ असोज ९ गतेको बैठकले अर्को व्यवस्था नभएसम्मका लागि अध्यक्षको जिम्मेवारी शर्मालाई दिएको हो। हाल उनी अर्थ मन्त्रालयमा कार्यरत छन्।
कार्यभार ग्रहण गर्दै अध्यक्ष शर्माले वर्तमान चुनौतीपूर्ण परिस्थितिमा बीमा सेवालाई अझ गुणस्तरीय, विश्वसनीय र प्रभावकारी बनाउनु आवश्यक रहेको बताए। उनले बीमा दाबी भुक्तानी प्रक्रिया छिटोछरितो र सरल बनाउनुपर्नेमा जोड दिए।
“नयाँ पुस्ताको सोच र बदलिँदो परिवेशअनुसार सरकारले ल्याएका नीति तथा कार्यक्रमअनुरूप बीमा क्षेत्रको सेवा स्तर वृद्धि गरिनेछ,” अध्यक्ष शर्माले भने, “सर्वसाधारणमा बीमाप्रतिको विश्वास बढाउन बीमा कम्पनीहरूले प्रचलित कानूनअनुसार अघि बढ्नुपर्छ, र प्राधिकरणले नियमनलाई अझ प्रभावकारी बनाउनेछ।”
उनले बीमा कम्पनीहरूलाई दाबी भुक्तानी प्रक्रिया झन्झटरहित बनाई समयमै भुक्तानी गर्न निर्देशन दिए। यसले बीमाप्रतिको विश्वास बढाउने र बीमाको पहुँच विस्तार हुने, जसले गर्दा लागत पनि घट्ने उनले उल्लेख गरे।
अध्यक्ष शर्माले प्राधिकरणका कर्मचारीहरूलाई सही नियतका साथ गुणस्तरीय र शीघ्र कार्यसम्पादन गर्न निर्देशन दिएका छन्।
Leave a Reply