सामसुङ ‘ग्यालेक्सी नोट फोर’ नेपाली बजारमा

काठमाडौ । बहुप्रतिक्षित स्मार्टफोन सामसुङ ‘ग्यालेक्सी नोट फोर’ नेपाली बजारमा ल्याइएको छ । सामसुङ मोबाइलको नेपालका लागि आधिकारिक बिक्रेता आइएमएसले नोट फोर एक समारोह आयोजना गरी काठमाडौँमा सार्वजनिक गरेको हो ।

सामसुङ ‘ग्यालेक्सी नोट फोर’ को नेपाली मूल्य ८५ हजार ९ सय तोकिएको छ भने यसभन्दा अघिल्लो सिरिज नोट थ्री सार्वजनिक गर्दा ९१ हजार पाँच सय रुपैयाँ मूल्य तोकिएको थियो ।

पछिल्लो समय सामसुङको नोट सिरिजले उपभोक्ताको ध्यान राम्रैसँग तान्न सफल भएको छ । आइएमएसले नोट फोर टुजी, थ्रिजी र फोरजी नेटवर्क सपोर्ट गर्ने जनाएको छ । १ सय ७६ ग्राम तौल भएको नोट फोरमा ५ दशमलब ७ इञ्च ठूलो डिस्प्ले रहेको छ ।

गोरिल्ला ग्लासको प्रयोग गरिएको हुँदा स्र्वाच नहुने पनि कम्पनीले जनाएको छ । मोवाइलमा सुपर एमलोइड क्यापासिटि टचस्क्रिनको प्रयोग गरिएको छ भने नोटफोरमा ३२ जीबी इन्टरनल मेमोरी रहेको छ । आवश्यकता अनुसार १ सय २८ जीबीसम्मको माइक्रो ममोरी प्रयोग गर्न सकिन्छ । १६ मेगापिक्सेल रियर क्यामेरा र ३ दशमलब ७ मेगापिक्सेल फ्रन्ट क्यामेरा रहेको छ । जस कारण उच्चस्तरीय फोटो खिच्न सकिन्छ । अटोफोकस, एलइडी फ्लास, डिउल सट, टच फोकस, फेसरस्माइल डिटेक्सन, पानोरामा, एचडिआर लगायतका सुविधाहरु क्यामेरामा रहेका छन् ।