इनोभेसननेपाल वेबसाइटको शुभारम्भ

ललितपुर । विश्वभरका नवप्रवर्तकहरूले नेपालमा गरेका नवप्रवर्तन र आविष्कारहरू पहिचान र नक्साङ्कन गर्न भन्दै नेपाल विज्ञान प्रविधि प्रज्ञा प्रतिष्ठान, नास्टले इनोभेसननेपाल डट नास्ट डट जिओभी डट एनपी वेबसाइटको शुभारम्भ गरेको छ ।

पूर्व विज्ञान तथा प्रविधि मन्त्री इन्जिनियर गणेश साह र नास्टका उपकुलपति डा. सुनिलबाबु श्रेष्ठले संयुक्त रुपमा आज वेबसाइटको उद्घाटन गरेका हुन ।

उदघाटनकोक्रममा नास्टका उपकुलपति श्रेष्ठले स्वदेशमा न्यासनल इनोभेसन सेन्टर बनाउने लागि परेको बताए ।

नास्टका प्रविधि संकायको प्रमुख रविन्द्रप्रसाद ढकालले नवप्रवर्तकहरुका लागि इनोभेसननेपाल वेबसाइटले मद्दत मिल्ने बताए ।

डेटा फर डेभलपमेन्ट इन नेपाल प्रोग्राम, एशिया फाउणंडेसन, डेभलपमेन्ट इनिसिएटीभ र युके एडको आर्थिक सहयोग गरिएको नास्टले जनाएको छ । ‘इनोभेसन वेबसाइटलाई रोवटिक्स एसोसियसन अफ नेपाल र नक्सा प्रालिले प्राविधिक सहयोग गर्नेछ’ प्रविधि संकायका प्रमुख ढकालले भने । संरक्षकको रुपमा शिक्षा, विज्ञान तथा प्रविधि मन्त्रालय र नास्टले प्रशासकको भूमिकामा रहेने बताइएको छ ।

यस वेबसाइटले विभिन्न चरणमा रहेका, तत्काल कार्यान्व्यन गर्न सकिने तथा व्यापकरूपमा अगाडि बढाउन सकिने नवप्रवर्तनहरू खोज्न वा थप्न सकिने वेबसाइटमा उल्लेख छ ।

नवप्रवर्तकहरूको नवप्रवर्तनको प्रकृति, कार्यान्वयनको चरण अनुसार व्यापकरूपमा अगाडि बढाउन उनीहरूले खोजिरहेको सहयोग, सम्पर्क विवरण र अन्य विविध जानकारी सहित नवप्रवर्तनहरूको विस्तृत जानकारी हासिल गर्ने साझा मञ्च बन्ने अपेक्षा गरिएको वेबसाइटमा उल्लेख गरेको छ ।

इनोभेसननेपाल वेबसाइटमा उल्लेख भएअनुसार ‘यसले एक केन्द्रीय हबको रूपमा रहेर नेपालभरका समुदाय, व्यक्ति, समुह, निजी क्षेत्र, गैर-सरकारी संस्थाबाट कार्यान्वयनमा आएका विभिन्न चरणहरूमा रहेका सबै पहलहरूको अभिलेख राख्दछ र त्यस्ता पहलहरूलाई सहयोग पुर्‍याउँछ ।’