—लक्ष्मण डंगोल

काठमाडौं। विज्ञान-प्रविधि, नवप्रवर्तन र उद्यमशीलता राष्ट्रिय युवा सम्मेलन आजदेखि सुरु भएको छ । युवालाई नवप्रवर्तन र उद्यमशीलतासँग जोड्न सम्मेलन आयोजना गरिएको राष्ट्रिय युवा परिषद्ले जनाएको छ ।

परिषद्का कार्यकारी उपाध्यक्ष माधवप्रसाद ढुङ्गेलले यस सम्मेलनले विज्ञान-प्रविधि क्षेत्रका युवा उद्यमशीलता थप उजागर हुने बताए । ‘सम्मेलनबाट प्राप्त सुझाव विज्ञान र प्रविधिको नीति निर्माणमा सहयोग पुग्नेछ,’ उपाध्यक्ष ढुंगेलले भने, ‘युवा प्रतिभा प्रस्फुटन सातै प्रदेशमा नवप्रवर्तन केन्द्र स्थापना गरिनेछ ।’

शिक्षा, विज्ञान तथा प्रविधि मन्त्रालयका सचिव रामप्रसाद थपलियाले विद्यालय तहमा विज्ञान-प्रविधिको क्षेत्रमा विद्यार्थीलाई आकर्षित गर्ने कार्यक्रम सञ्चालन गर्दै आइरहेको बताए । थप आकर्षण गर्न कार्यक्रमहरुका तयारी गरिरहेको सचिव थपलियाले उल्लेख गरें ।

त्रिभुवन विश्वविद्यालयका उपकुलपति प्राडा धर्मकान्त बाँस्तोलाले अनुसन्धान र नवप्रवर्तन क्षेत्रमा बजेट कम भएको बताए । सरकारले प्रयाप्त लगानी गरे यस क्षेत्रमा युवालाई स्वरोजगार बनाउन सकिनेछ, उनले भने ।

नेपाल विज्ञान तथा प्रज्ञा–प्रतिष्ठान, नास्टका उपकुलपति डा. सुनिलबाबु श्रेष्ठले विज्ञान-प्रविधिले दैनिक जीवनमा आइपर्ने समस्या समाधान गर्ने हुँदा वैज्ञानिक समुदायले त्यसतर्फ आफ्ना अनुसन्धानलाई केन्द्रित गर्न पर्ने सुझाए । ‘नाष्टले पछिल्लो समय नवप्रवर्तनलाई पहिलो प्राथमिकतामा राखेको छ,’ उपकुलपति श्रेष्ठले भने, ‘मुलुकमा दिगो समृद्धि हासिल गर्न युवा जनशक्तिलाई नवाप्रवर्तनसँग जोड्न पर्दछ ।’

काठमाडौँ विश्वविद्यालय(केयु)का उपकुलपति डा. भोला थापाले विज्ञान र उद्यमशीलतासँगै लैजानु पर्ने बताए । केयुले वनेपामा अवस्थित आइटी पार्क र युवा इनोभेसन आइडियामा काम गरिरहेको उनले जानकारी दिए ।  

सम्मेलनमा विज्ञान, प्रविधि, शिक्षा, स्वास्थ्यलगायत विभिन्न विषयमा अनुसन्धानकर्ताले मौखिक कार्यपत्र प्रस्तुत गरेका छन् ।  पहिलो दिनको शत्रमा  शिक्षा, अनुसन्धान र नवप्रवर्तन र विज्ञानमा अवसर जस्ता विषयमा छलफल चलाएका थिए ।

त्यस्तै, सम्मेलन अन्तिमदिन राष्ट्रिय विज्ञान-प्रविधि नीति कार्‍यान्वयन र विज्ञान-प्रविधि, नवप्रवर्तन र उद्यमशीलताका विषयमा छलफल गरिने सम्मेलन आयोजकका सदस्य खिम पन्थीले बताए ।

परिषद्ले प्रथम विज्ञान, सूचना तथा प्रविधि राष्ट्रिय युवा सम्मेलन-२०७५ आयोजना गरेसँगै विज्ञानको क्षेत्रमा विभिन्न युवा लक्षित सम्मेलनलाई निरन्तरता दिदै आएको छ ।