–रिभोसाइन्स संवाददाता
काठमाडौं । शिक्षा, विज्ञान तथा प्रविधि मन्त्रालयद्वारा पत्रकार मणि दाहाललाई विज्ञान पत्रकारिता पुरस्कारबाट पुरस्कृत गरेको छ । नवौं राष्ट्रिय विज्ञान दिवस २०७८को अवसरमा आयोजित कार्यक्रममा दाहललाई विज्ञान पत्रकारिता पुरस्कार पदान गरिएको हो ।
पत्रकार दाहाललाई नेपाल पत्रकार महासंघको सिफारिसअनुसार कदर गरिएको मन्त्रालयले जनाएको छ । पुरस्कारको राशी पच्चिस हजार र प्रमाण पत्र रहेका छन् । पत्रकार दाहाल विज्ञान र राजनीतिमा कलम चलाउँदै आएका छन् । उनी नेपाल विज्ञान पत्रकार मञ्चको निवर्तन सदस्यसमेत हुन् ।
यसैगरी विपत न्यूनिकरण पुरस्कार डा. प्रदिप ज्ञवाली, उदयीमान प्रविधि पुरस्कार आभाष मास्के, एरोनोटिकल पुरस्कार दीपकप्रसाद बास्तोला, जैविक प्रविधि पुरस्कार प्राडा प्रकाश घिमिरे र अन्तरिक्ष प्रविधि प्राडा उदयराज खनाललाई प्रदान गरिएको छ ।
पुरस्कार छनोटमा नेपाल स्वास्थ्य अनुसन्धान परिषद्, नेपाल विज्ञान तथा प्रविधि प्रतिष्ठान, जैविक प्रविधि केन्द्रिय विभाग, एरोनोटिकल सोसाइटी र वीपी प्लानेटोरियम, अव्जभेटरी तथा साइन्स म्यूजियम डेभलभमेन्ट बोर्डले भूमिका खेलेको मन्त्रालयले उल्लेख गरेको छ ।
शिक्षा, विज्ञान तथा प्रविधि मन्त्रालयले ‘विज्ञान र प्रविधिको उन्नत विकासः प्रकोप र महामारीबाट सहज निकास’ भन्ने मूल नाराका साथ नवौं राष्ट्रिय विज्ञान दिवस २०७८ सव्ताहव्यापी मनाइरहेको छ ।
Leave a Reply