काठमाडौँ । वातावरण, विज्ञान तथा प्रविधि पूर्वमन्त्री इन्जिनियर गणेश साहले नेपालमा वैज्ञानिक उत्पादनमा वृद्धि गर्न देशभरका विद्यालयहरूमा विज्ञान प्रदर्शनीको संस्कृति विकास गर्नुपर्नेमा जोड दिएका छन् । सामाखुसीस्थित रेडन कलेजले माघ २२ गतेदेखि आयोजना गरेको दुई दिने ‘रेडन साइन्स एण्ड रोबो एक्स्पो’ को उद्घाटनको क्रममा पूर्व विज्ञान मन्त्री साहले बताएका हुन ।
पूर्व विज्ञान मन्त्री साहले भने ‘हामीले अव माइस अर्थात् ‘एम.आइ.सी.इ.’ मोडलमा काम गर्न पर्नेछ।’ एम अर्थात् मिटिङ , आइ ‘इनोभेसन’, सी ‘कन्फेरेन्स’ र इ अर्थात् आन्टरपेनरशीप जस्ता चार क्षेत्रमा सँगै काम हुन सके आगामी दिनमा नेपालमा विज्ञान तथा प्रविधिको क्षेत्रको विकास हुने उनले सुनाए।
करिब छ दशक विज्ञान प्रवर्द्धन तथा विकासमा लागि परेका पूर्व विज्ञान मन्त्री साहले भने, ‘विभिन्न प्रकारका समस्या समाधान वैज्ञानिकले गर्ने र गर्दै आएको हुँदा तपाईँहरूले आजैदेखि समाधान केन्द्रित ‘इनोभेटिप कन्सेप्ट’मा काम गर्नु पर्दछ।’
माघ २३ गतेसम्म चल्ने साइन्स एस्पोमा कक्षा ५-७ र ८-१० कक्षामा अध्ययनरत विद्यार्थीहरूले बनाएका नमुनाहरूको प्रदर्शनीमा प्रतिस्पर्धा हुनेछ। प्रत्येक समूहका विजयीले नगद पन्ध्र हजार पाउने कलेजले जनाएको छ ।
त्यस्तै कक्षा ५-७ र ८-१० कक्षामा अध्ययनरत विद्यार्थीहरूले ‘रोबो रेस’ र ‘रोबो सकर’ मा प्रतिस्पर्धा हुनेछ । प्रत्येक विजेताले नगद पन्ध्र हजार प्राप्त गर्नेछ ।
कलेजका एकेडेमिक डिरेक्टर सुनोज कैनीका अनुसार उत्कृष्ट प्रदर्शनी गर्ने समूहलाई नगद २५ हजार प्रदान गर्नेछ । एस्पोमा सूर्य अवलोकन, खगोलीय ग्रह तथा तारा सम्बन्धी भर्चुअल प्लानेटोरियम तथा आर्ट एण्ड क्राफ्टका नमुनाहरू प्रदर्शनी हुनेछ ।
Leave a Reply