सानिमा जिआइसी इन्स्योरेन्सको नाफामा दोहोरो अंकको वृद्धि, वित्तीय सूचकहरू सुदृढ

काठमाडौं । सानिमा जिआइसी इन्स्योरेन्स कम्पनी लिमिटेडले आर्थिक वर्ष २०८१/८२ को चौथो त्रैमासिकमा दोहोरो अंकको नाफा वृद्धि हासिल गरेको छ।

कम्पनीले हालै सार्वजनिक गरेको वित्तीय विवरणअनुसार, सो अवधिमा कम्पनीले ३५ करोड ३ लाख ८८ हजार रुपैयाँ खुद नाफा आर्जन गरेको छ, जुन अघिल्लो वर्षको तुलनामा १०.१३ प्रतिशतले बढी हो।

अघिल्लो आवमा कम्पनीले ३१ करोड ८१ लाख ६८ हजार रुपैयाँ नाफा कमाएको थियो। यस वर्ष कम्पनीको खुद बीमा शुल्क आर्जन पनि ८.९९ प्रतिशतले वृद्धि भई ७८ करोड ७४ लाख रुपैयाँ पुगेको छ, जबकि अघिल्लो वर्ष यो रकम ७२ करोड २५ लाख रुपैयाँ थियो।

अन्य प्रमुख वित्तीय सूचकहरूमा कमिसन आम्दानी ३९ करोड ३५ लाख रुपैयाँ छ भने लगानी तथा कर्जाबाट आम्दानी १७ करोड १ लाख रुपैयाँ छ । कुल आम्दानी भने १ अर्ब ४७ करोड ६८ लाख ७३ हजार रुपैयाँ भएको छ, जुन २.७१ प्रतिशतले वृद्धि हो ।

कम्पनीको कुल खर्च ९७ करोड ६३ लाख १७ हजार रुपैयाँ देखिएको छ, यो २.०५ प्रतिशतले घटेको उल्लेख छ । खुद दाबी भुक्तानी भने  ३८ करोड ७० लाख रुपैयाँ रहेको छ ।

कम्पनीको चुक्ता पुँजी हाल २ अर्ब १५ करोड रुपैयाँ रहेको छ। साथै, विशेष जगेडा कोषमा ७५ करोड ९८ लाख र महाविपत्ति कोषमा ४ करोड ६४ लाख रुपैयाँ राखिएको छ।

कम्पनीको प्रति शेयर आम्दानी (इपीएस) १६.३० रुपैयाँ रहेको छ भने प्रति शेयर नेटवर्थ १५२.१२ रुपैयाँ रहेको छ ।