काठमाडौँ, भदौ १० — नेपालको सांस्कृतिक सम्पदा, इतिहास र सौन्दर्यलाई अन्तर्राष्ट्रिय स्तरमा उजागर गर्ने उद्देश्यसहित “काठमाडौँ क्रोनिकल्स” नामक नयाँ अनुभवात्मक कार्यक्रमको घोषणा गरिएको छ।
एमक्यूब नेपाल र बीवाइडीबीचको सहकार्यमा म्यारियट काठमाडौँद्वारा आयोजना गरिने यो कार्यक्रम एमआइसीइ ‘माइस’ (मीटिङ, इन्सेन्टिभ, कन्फरेन्स र एक्जिबिसन) क्षेत्रका सरोकारवालाहरूका लागि विशेष रूपमा तयार पारिएको हो।
कार्यक्रमले परम्परागत सम्मेलन हलको सीमालाई पार गर्दै सहभागीहरूलाई नेपालको जीवित सम्पदासम्म पुर्याउने प्रयास गरेको छ। यसले व्यवसायिक सहकार्यलाई सांस्कृतिक यात्रासँग जोड्दै काठमाडौँलाई ‘माइस’ गन्तव्यका रूपमा स्थापित गर्ने लक्ष्य राखेको छ।
कार्यक्रमको मुख्य आकर्षण ‘ट्रेजर हन्ट’ हुनेछ, जुन काठमाडौँ उपत्यकाका तीन प्रमुख सम्पदा स्थलहरू काठमाडौँ दरबार स्क्वायर, पाटन दरबार स्क्वायर र स्वयम्भूनाथमा आयोजना गरिनेछ। सहभागीहरूलाई विभिन्न समूहमा विभाजन गरी बीवाइडीका गाडीमार्फत ती स्थलहरूमा पुर्याइनेछ, जहाँ उनीहरूले पजल समाधान गर्ने, टास्कहरू पूरा गर्ने र सम्पदाका कथाहरू जीवन्त रूपमा अनुभव गर्ने अवसर पाउनेछन्।
कार्यक्रम म्यारियट काठमाडौँबाट सुरु भई फेयरफिल्ड बाइ म्यारियटमा समापन हुनेछ। समापन समारोहमा उत्कृष्ट प्रदर्शन गर्ने टोलीलाई “काठमाडौँ एक्सपर्ट्स”को उपाधि प्रदान गरिनेछ।
एमक्यूब र बीवाइडीबीचको सहकार्यले सहभागीहरूलाई केवल रमाइलो अनुभव मात्र होइन, काठमाडौँलाई सम्पदा र अतिथ्यको सहरका रूपमा चिन्ने नयाँ दृष्टिकोण पनि प्रदान गर्ने अपेक्षा गरिएको छ। आयोजकहरूका अनुसार, यो कार्यक्रमले नेपाललाई अन्तर्राष्ट्रिय ‘माइस’ बजारमा थप प्रतिस्पर्धी बनाउनेछ।
Leave a Reply