काठमाडौँ । अन्तर्राष्ट्रिय पर्यटन दिवस राष्ट्रिय फोटो पत्रकार समूह नेपाल (एनएफपिजे) ले काठमाडौँको हनुमान ढोकामा फोटो प्रदर्शनी आयोजना गरेको छ।
काठमाडौँ महानगरपालिका, नेपाल आर्ट काउन्सिल र नेपाल पर्यटन बोर्डको संयुक्त संयोजनमा सुरु गरिएको प्रदर्शनी मेड इन काठमाडौँ फेस्ट २०८२ को अवसरमा सुरु भए पनि जेनजी आन्दोलनका कारण बिचमै स्थगित भएको थियो।
बिहीबार हनुमान ढोकामा एक कार्यक्रमका बीच पूर्वकुमारी मनिता शाक्य, राष्ट्रिय फोटो पत्रकार समूहका अध्यक्ष प्रदीपराज वन्त, पूर्व गणेश तथा भैरवले संयुक्तरुपमा उद्घाटन गरे।
प्रदर्शनीमा राष्ट्रिय फोटो पत्रकार समूहका सदस्यहरूले खिचेका १ सय फोटोहरू रहेका छन्। योसँगै प्रदर्शनीमा इन्द्रजात्रासँग सम्बन्धित विविध गतिविधिहरूलाई आकर्षक रूपमा प्रस्तुत गरिएको छ।
त्यस्तै, लाखे नाचको जोसदेखि साँघुरा गल्लीहरूमा गुन्जिने धुनदेखि डबलीमा उमङ्गित भीडसम्म — इन्द्रजात्राका महत्त्वपूर्ण क्षणहरूलाई क्यामेरामा कैद गरिएका तस्बिरमार्फत प्रदर्शनीमा राखिएका छन् ।
तीन दिनसम्म चल्ने प्रदर्शनी बिहान ११ बजेदेखि बेलुकी ५ बजेसम्म सर्वसाधारणका लागि खुला रहनेछ ।
Leave a Reply