काठमाडौं । नेपाल बीमा प्राधिकरण र नबिल बैंक लिमिटेडबीच एयरमार्क प्रणालीलाई पूर्ण रूपमा स्वचालित बनाउन ए.पी.आई. इन्टिग्रेशन सम्बन्धी सम्झौता भएको छ।
सम्झौतापत्रमा नेपाल बीमा प्राधिकरणका कार्यकारी निर्देशक सुशील देव सुवेदी र नबिल बैंकका प्रमुख बजार अधिकृत निरज शर्माले हस्ताक्षर गरें ।
कार्यक्रममा कार्यकारी निर्देशक सुवेदीले यस सम्झौताबाट बीमा क्षेत्रको एयरमार्क प्रणालीलाई अटोमेसनमा रूपान्तरण गर्न महत्वपूर्ण योगदान पुग्ने विश्वास व्यक्त गरे । उनले बीमकहरूको लगानी प्रक्रिया छिटो, छरितो र त्रुटिरहित हुने बताउँदै नियमन तथा निरीक्षण कार्यलाई थप दक्ष र पारदर्शी बनाउन सहयोग पुग्ने उल्लेख गरे।
ए.पी.आई. इन्टिग्रेशन अन्तर्गत बीमकहरूले मुद्दती निक्षेपमा गर्ने लगानीको एयरमार्क व्यवस्थापनलाई प्रविधिमार्फत सहज, सुरक्षित र विश्वसनीय बनाइनेछ। यस प्रणालीले प्राधिकरणबाट बैंकमा पठाइने ब्लक तथा अनब्लक रिक्वेस्टहरूलाई स्वतः प्रमाणीकरण गर्नेछ। सही विवरण भएको रिक्वेस्ट मात्र स्वीकृत हुनेछ भने त्रुटिपूर्ण विवरण भएमा प्रणालीले त्यसलाई एयरमार्क प्लेटफर्ममार्फत बीमकलाई स्वचालित रूपमा फिर्ता पठाउने व्यवस्था गरिएको छ।
यस इन्टिग्रेशनका लागि नबिल बैंकले विशेष मिडिलवेयर विकास गरेको छ, जसले बीमकहरूबाट प्राधिकरण हुँदै प्राप्त मुद्दती निक्षेप सम्बन्धी विवरणलाई बैंकको कोर बैंकिङ प्रणालीमा प्रत्यक्ष पहुँच प्रदान गर्नेछ। प्रणालीले सही विवरण मात्र स्वीकार गर्ने र त्रुटिपूर्ण विवरणलाई अस्वीकार गर्ने प्रक्रिया स्वचालित रूपमा कार्यान्वयन गर्नेछ।
यो सम्झौता नेपाल बीमा प्राधिकरणको डिजिटल ट्रान्सफर्मेशन र प्रविधिमैत्री नियमनतर्फको अर्को महत्वपूर्ण कदम मानिएको छ। यसले बीमा क्षेत्रको दक्षता, पारदर्शिता र समय–उपयुक्त सेवा प्रवाहमा उल्लेखनीय योगदान पुर्याउने अपेक्षा गरिएको छ।
Leave a Reply