जर्मन राष्ट्रपति स्टाइनमायरले गरे सेसामे प्रयोगशालाको भ्रमण

अलन (जोर्डन), फागुन १०। जर्मनीका राष्ट्रपति फ्राङ्क–वाल्टर स्टाइनमायरले मंगलबार जोर्डनस्थित सेसामे प्रयोगशाला भ्रमण गरेका छन्। जोर्डनको राजकीय भ्रमणको क्रममा उनले राजधानी अमानको उत्तर–पश्चिममा अवस्थित प्रयोगशाला अवलोकन गरेकाे हो।

गत वर्ष जर्मनीले सेसामेमा सह–सदस्य बन्ने घोषणा गरेको थियो। यसअघि २००४ देखि जर्मनी सेसामे परिषद्को पर्यवेक्षक रहँदै आएको छ। जर्मनीले प्रारम्भिक चरणमै बिस्सी–१ सिङ्क्रोट्रोन दान गरेर प्रयोगशालाको स्थापना सुदृढ गरेको थियो।

भ्रमणको अन्त्यमा राष्ट्रपति स्टाइनमायरले प्रयोगशालाको अतिथि पुस्तकमा हस्ताक्षर गर्दै भने, “म मध्यपूर्वका विभिन्न देशहरूबीचको सफल सहकार्यबाट प्रभावित छु। अनुसन्धानकर्ताहरूको यो काम अन्तर्राष्ट्रिय सहकार्यको अमूल्य सम्पदा हो। जर्मनी आगामी वर्षहरूमा पनि यस वैज्ञानिक स्थललाई समर्थन गर्दै जानेछ।”

जर्मन संघीय अनुसन्धान, प्रविधि तथा अन्तरिक्ष मन्त्रालयका राज्यमन्त्री मार्कस प्लेयरले सेसामे परिषद्का अध्यक्ष रोफ ह्युअरलाई पठाएको पत्रमा भनेका छन्, “सह–सदस्य बन्ने निर्णय सेसामेका उपलब्धिहरूको सम्मान हो। यसमार्फत जर्मनीले विज्ञान कूटनीतिमा सेसामेको भूमिकालाई अझ मजबुत बनाउन चाहन्छ।”

सेसामेका निर्देशक डा. खालिद तुकानले राष्ट्रपति स्टाइनमायरलाई स्वागत गर्दै भने, “यो प्रयोगशालाले मध्यपूर्व तथा छिमेकी क्षेत्रलाई विश्व वैज्ञानिक नक्सामा स्थापित गरेको छ।”

सेसामे तेस्रो पुस्ताको लाइट सोर्स सुविधा हो, जसलाई अन्तर–सरकारी संगठनका रूपमा सञ्चालन गरिन्छ। हाल यसका सदस्य राष्ट्रहरूमा साइप्रस, इजिप्ट, इरान, इजरायल, जोर्डन, पाकिस्तान, प्यालेस्टाइन र टर्की रहेका छन्। जर्मनी प्रयोगशालाको पहिलो सह–सदस्य बनेको छ।