डेपुटी गभर्नर पण्डितसँग बैंकर्स संघको भेट, कर्जाको माग बढाउने नयाँ आइडिया माग

काठमाडौं, चैत २७। नेपाल राष्ट्र बैंकका नवनियुक्त डेपुटी गभर्नर किरण पण्डितसँग नेपाल बैंकर्स संघले शुक्रबार भेट गरेको छ।

संघको टोलीले पण्डितलाई पदभार ग्रहण गरेकोमा बधाई दिँदै बैंकिङ क्षेत्रले सामना गरिरहेका समस्याबारे छलफल गरेको सहभागी कुमारी बैंकका सिईओ रामचन्द्र खनालले जानकारी दिए।

भेटका क्रममा डेपुटी गभर्नर पण्डितले बजारमा तरलता अत्यधिक रहेको उल्लेख गर्दै यसको सदुपयोग कसरी गर्न सकिन्छ भन्नेबारे सुझाव मागेका थिए। उनले सरकार नयाँ भएकाले पुराना अभ्यासभन्दा फरक तरिकाले कर्जाको माग कुन क्षेत्रमा बढाउन सकिन्छ भन्ने नयाँ आइडिया दिन आग्रह गरेको सहभागी एक सिईओले बताए।

संघका अध्यक्ष सन्तोष कोइरालाको नेतृत्वमा गएको टोलीले प्रोभिजन सम्बन्धी प्रावधानमा संशोधनका लागि यसअघि बनेको कमिटीले काम गरिरहेको स्मरण गराउँदै, छिट्टै कार्यान्वयनमा आए ऋणीलाई केही राहत हुने धारणा व्यक्त गरेको थियो।

यस भेटलाई बैंकिङ क्षेत्रको आगामी नीति तथा कर्जा विस्तारमा नयाँ दृष्टिकोण खोज्ने प्रयासको रूपमा हेरिएको छ।