काठमाडौँ, भदौ । यही भदौ १३, १४ र १५ गते काठमाडौँको भृकुटीमण्डपमा ‘नेपाल इलेक्ट्रिक पावर एण्ड लाइटस्’ तथा ‘नेपाल कन्जुमर इलेक्ट्रोनिक्स एण्ड होम अपलायनसेस’ अन्तर्राष्ट्रिय प्रदर्शनीको चौथो संस्करण आयोजना हुँदैछ।
मिडिया स्पेस सोल्युसनस्, फ्युचरेक्स ट्रेड फेयर एण्ड इभेन्ट्स, तथा एक्जीबिसन एण्ड ट्रेड सर्भिसेस इंडियाको संयुक्त आयोजनामा हुने यो प्रदर्शनीमा नेपाल विद्युत प्राधिकरण र नेपाल सौर्य विद्युत उत्पादक संघ सहयोगी संस्थाको रूपमा रहनेछन्।
प्रदर्शनीमा स्वदेशी तथा विदेशी कम्पनीहरूका १ सय भन्दा बढी स्टलहरू रहनेछन्। सहभागी कम्पनीहरूले अत्याधुनिक ट्रान्समिसन तथा डिस्ट्रीब्युसन सामग्री, उर्जा आपूर्ति तथा कन्ट्रोल डिभाइस, हाउस वायरिङ्ग, तार, केबुल, कन्डक्टर, एलईडी लाइटिङ्ग, घरेलु विद्युतीय उपकरण, चार्जिङ स्टेशन, ब्याट्री, कार्यालय प्रयोजनका उपकरण तथा अन्य नवीनतम प्रविधि प्रदर्शनीमा प्रस्तुत गर्नेछन्।
आयोजकहरूका अनुसार, प्रदर्शनीको उद्देश्य देशमा जलविद्युतको खपत बढाउँदै आर्थिक सबलीकरणमा योगदान पुर्याउनु, उर्जा तथा विद्युतीय व्यवसायीहरूको समग्र विकास र व्यापार प्रवर्द्धन गर्नु हो। साथै, गुणस्तरीय विद्युतीय सामग्रीको व्यवसाय विस्तार, आन्तरिक तथा अन्तर्राष्ट्रिय व्यापारको सहजीकरण र प्रवर्द्धनमा पनि प्रदर्शनीले सहयोग गर्नेछ।
दशैंको अवसर पारेर आयोजना गरिने यस प्रदर्शनीमा ग्राहकहरूले विभिन्न कम्पनीका विद्युतीय सामग्रीहरू एकै ठाउँमा अवलोकन गर्न र मन परेको सामान खरिद गर्न सक्नेछन्। नेपालीहरूको महान पर्व बडादशैंको केही हप्ता अगाडि आयोजना हुने भएकाले ग्राहकहरूलाई सहज र सुलभ रूपमा नयाँ प्रविधिका सामानहरू खरिद गर्ने अवसर मिल्नेछ।
प्रदर्शनीले राष्ट्रिय तथा अन्तर्राष्ट्रिय इलेक्ट्रीक, इलेक्ट्रोनिक्स, सञ्चार तथा सूचना प्रविधि, वैकल्पिक उर्जा उद्यमीहरूलाई एकै स्थानमा ल्याई व्यवसायिक प्रवर्द्धन, नविनतम उपलब्धिहरूको आदान–प्रदान तथा उपभोक्तामा उर्जाको व्यवस्थित प्रयोगबारे चेतना फैलाउने लक्ष्य राखेको छ।
नेपाल इलेक्ट्रिक, पावर, लाइटस् तथा कन्जुमर इलेक्ट्रोनिक्स एण्ड होम अपलायनसेस प्रदर्शनीले नेपालमा विद्युत तथा उर्जासँग सम्बन्धित उद्योगहरूबीच साझेदारी, सम्बन्ध विस्तार र व्यवसायिक अवसर सिर्जना गर्ने केन्द्रको भूमिका निर्वाह गर्ने अपेक्षा गरिएको छ।
Leave a Reply