‘पञ्चायतको घाउ’, शासन र शक्तिको दुरुपयोगविरुद्धको शक्तिशाली आवाज

नुवाकोट – शक्तिको दुरुपयोग कुन हदसम्म गर्न सकिन्छ ? बन्दुक देखाएर, जनताको छातीमा जुत्ता हानेर घरघरमा आगो लगाइँदा पनि सरकार किन बोल्दैन ? नुवाकोट जिल्ला भालडाँडाका गरिब किसानले आफ्नै माटो खोज्न र न्याय पाउन संघर्ष गर्नुपर्छ ? यो जनताको अधिकारको कुरा हो भन्न अदालत किन डराउँछ ?

डकुमेन्ट्री फिल्म ‘पञ्चायतको घाउ’ ले छोडेको विषय र प्रश्न यही हो ।

बेत्रगंगा सोसाइटीले बिहीबार नुवाकोटको विदुरमा आयोजना गरेको चौथो राष्ट्रिय नुवाकोट डकुमेन्ट्री फिल्म फेस्टिभलमा यो डकुमेन्ट्रीलाई उत्कृष्ट डकुमेन्ट्री फिल्मको अवार्ड दिइएको हो । यस वृत्तचित्रबाट लव प्याकुरेल उत्कृष्ट सम्पादक र उत्कृष्ट निर्देशक घोषित भएका थिए ।

डकुमेन्ट्रीले तत्कालीन राजाका एडीसी र सेनाका जनरल ऋषिकुमार पाण्डेले शक्ति र शासनको दुरुपयोगको कथा समेटेको छ, जसले सूर्यमती, भालडाँडामा सयौं मानिसहरूलाई घरबारविहीन बनाएको छ । पाण्डेले ४१ घरधुरीलाई घरबारविहीन बनाएका छन् भने सार्वजनिक सम्पत्तिसहित १ हजार ४ सय एकड जग्गा कब्जा गरेका छन् । डकुमेन्ट्री फिल्मको स्क्रिनिङका क्रममा पीडितको पनि उपस्थिति थियो ।

प्रमुख अतिथि चलचित्र विकास बोर्डका अध्यक्ष गणेश भण्डारीले भालडाँडाका जनताको समस्यामा जोड दिँदै यो समस्यालाई राष्ट्रियस्तरमा सम्बोधन गर्नुपर्ने बताउनुभयो । उनले डकुमेन्ट्रीलाई जनता, राष्ट्र र उनीहरुको जीवनसँग जोडेकोमा प्याकुरेललाई धन्यवाद दिए ।

डकुमेन्ट्री फिल्म हेरेपछि चलचित्र विकास बोर्डका सदस्य तथा निर्देशक युवराज लामा निकै भावुक भए । उनले गाउँलेलाई घरबारविहीन बनाउनेलाई कडा कारबाही गर्नुपर्ने बताए । जनरल पाण्डेले किसानमाथि गरेको दमनको समाचार गतिशील राष्ट्रिय मासिक पत्रिका (अहिले दैनिक) मा छापिएपछि डकुमेन्ट्री फिल्म निर्माण सुरु भएको बताइएको छ ।

महोत्सवमा नेपाली चलचित्रको अवस्था र विकासका बारेमा अन्तरक्रिया गरिएको थियो । बोर्डका अध्यक्ष भण्डारीले नेपाली चलचित्र निर्माण र विचारधाराका आधारमा बहुकेन्द्र स्थापना भएको जानकारी दिँदै उनले नेपाली चलचित्रको उत्थानका लागि छिट्टै नयाँ कार्यक्रम घोषणा गरिने बताए ।

महोत्सवमा इतिहास जित्नेहरुको लागि, साना हातियार ठूला समस्या, आइमाई, अन्त्यहीन युद्ध, रंगीबिरंगी चाराहरु, अनुभव, देवसरी, जलवायु परिवर्तन हाम्रो चिन्ता, इन्डोर स्मोकः द साइलेन्ट किलर, ढुंगे युगका चिम्पाजी, ब्रुहान, ग्रेटर नेपाल, हैन म हेल्पलेस थिइन जस्ता वृत्तचित्रहरु देखाइएका थिए ।