काठमाडौं । जेनजी आन्दोलनका क्रममा ज्यान गुमाएका शहीदप्रति श्रद्धाञ्जलि अर्पण गर्दै चौधरी ग्रुपले प्रत्येक शहीद परिवारका एक सदस्यलाई रोजगारी दिने घोषणा गरेको छ। समूहले शहीदप्रति उच्च सम्मान र परिवारजनप्रति गहिरो समवेदना प्रकट गर्दै सामाजिक उत्तरदायित्वको भावनासहित उक्त निर्णय लिएको हो।
चौधरी ग्रुपले आन्दोलनका क्रममा निजी निवास, कार्यालय, शोरूम तथा कारखानामा भएको ठूलो क्षति र विध्वंसले गहिरो पीडा दिएको उल्लेख गर्दै पनि पुनःनिर्माणको यात्रामा दृढतापूर्वक अघि बढ्ने प्रतिबद्धता जनाएको छ।
विज्ञप्तिमा समूहका प्रबन्ध निर्देशक निर्वाण चौधरीको भनाइ उद्धृत गर्दै उल्लेख गरिएको छ, “यो केवल हाम्रो वाचा मात्र होइन, हाम्रो गहिरो कर्तव्य र श्रद्धा हो। हामी सँगै उभिनेछौँ, पुनःनिर्माण गर्नेछौँ र आशा, सहानुभूति तथा सम्मानसहित देशको उज्ज्वल भविष्य निर्माण गर्नेछौँ।”
चौधरी ग्रुपले आफ्नो टिममार्फत सम्पूर्ण शहीद परिवारसँग सम्पर्क गरिरहेको जानकारी दिँदै सो प्रक्रियामा सहयोग गर्न इच्छुक व्यक्तिहरूले कम्पनीका कर्पोरेट कम्युनिकेसन विभाग प्रमुख मधुसूदन पौड्यालसँग सम्पर्क गर्न सक्ने जनाएको छ।
Leave a Reply