ललितपुर । नेपाल बीमा प्राधिकरण र त्रिभुवन विश्वविद्यालय तथ्याङ्कशास्त्र केन्द्रीय विभागबीच बीमा सम्बन्धी अनुसन्धान तथा ज्ञान आदान–प्रदानलाई सुदृढ बनाउन समझदारीपत्रमा हस्ताक्षर गरिएको छ।
प्राधिकरणका अध्यक्ष जनक राज शर्मा र विभागीय प्रमुख प्रभात उप्रेतीले आइतबार प्राधिकरणको केन्द्रीय कार्यालयमा उक्त समझदारीपत्रमा हस्ताक्षर गरेका थिए ।
अध्यक्ष शर्माले बीमा क्षेत्रको अनुसन्धानलाई अगाडि बढाउन तथा आवश्यक तथ्याङ्क संकलनमा यस समझदारीले महत्वपूर्ण सहयोग पुग्ने विश्वास व्यक्त गरे। उनले विश्वव्यापी रूपमा नयाँ अनुसन्धान र प्रविधि विकास भइरहेका सन्दर्भमा द्विपक्षीय सहकार्य अझ प्रभावकारी हुने धारणा राखेका थिए ।
त्यस्तै, विभागीय प्रमुख उप्रेतीले अनुसन्धानकर्ता तथा विद्यार्थीहरूलाई बीमा सम्बन्धी अध्ययन र ज्ञान आदान–प्रदानमा यस समझदारीले अवसर प्रदान गर्ने बताए।
समझदारीपत्रमा बीमा क्षेत्रको अवस्था, प्रभावकारिता, चुनौती, बीइतमा नीति, पहुँच, नयाँ बीमा लेखको आवश्यकता, दिगो विकासमा बीमा क्षेत्रको योगदान, सरकारी नीति तथा वित्तीय क्षेत्रसँग सम्बन्धित अनुसन्धानलाई प्राथमिकता दिने उल्लेख गरिएको छ।
यसैगरी, प्राधिकरणले अनुसन्धानका क्षेत्र पहिचान गर्ने, त्रि.वि. तथ्याङ्कशास्त्र विभागले प्राधिकरणको प्राथमिकताअनुसार विज्ञ उपलब्ध गराउने, प्राज्ञिक तथा अनुसन्धानका लागि तथ्याङ्क आदान–प्रदान गर्ने र बीमा अनुसन्धानसम्बन्धी तालिम सञ्चालन गर्ने व्यवस्था पनि समझदारीपत्रमा समावेश गरिएको छ।
कार्यक्रममा प्राधिकरणका कार्यकारी निर्देशक सुशील देव सुवेदी, निर्देशकहरू पुजन ढुंगेल अधिकारी, कुन्दन सापकोटा, शाम्भ राज लामिछाने र निर्मल अधिकारी उपस्थित थिए। त्यस्तै, त्रि.वि. तथ्याङ्कशास्त्र विभागतर्फबाट प्रा.डा. श्रीजनलाल श्रेष्ठ तथा लेक्चरर अरूण यादव सहभागी थिए।
Leave a Reply