ज्योति विकास बैंकका ग्राहकलाई सौराहास्थित ‘राइनो लज एण्ड होटल’ मा विशेष छुट

काठमाडौँ, माघ १४ । ज्योति विकास बैंक लिमिटेडले चितवन सौराहास्थित राइनो लज एण्ड होटलसँग सम्झौता गर्दै आफ्ना ग्राहकलाई विशेष छुटको सुविधा उपलब्ध गराउने भएको छ। सम्झौता अनुसार बैंकका ग्राहकले उक्त होटलमा २५ प्रतिशतसम्म छुट प्राप्त गर्न सक्नेछन्।

सौराहाको रमणीय प्राकृतिक दृश्य, शान्त वातावरण र उच्चस्तरीय सेवा सुविधाका कारण राइनो लज एण्ड होटल पर्यटकहरूको आकर्षणको केन्द्र बनेको छ। यस सम्झौताले बैंकका ग्राहकलाई पर्यटन अनुभव अझ सहज र किफायती बनाउन मद्दत गर्ने अपेक्षा गरिएको छ।

ज्योति विकास बैंकले संस्थागत सुशासन र सामाजिक उत्तरदायित्वलाई प्राथमिकता दिँदै समाजमा सकारात्मक परिवर्तन ल्याउने उद्देश्यसहित विभिन्न पहलहरू गर्दै आएको छ। बैंकले आफ्नो खुद नाफाबाट सामाजिक उत्तरदायित्व अन्तर्गत अन्य वित्तीय संस्थाभन्दा ५० प्रतिशत बढी रकम छुट्याएर समाजप्रति थप जिम्मेवार बनेको जनाएको छ।

स्वास्थ्य र जीवनरक्षामा विशेष ध्यान दिँदै बैंकले नवजात शिशुको अकाल मृत्यु रोकथामका लागि चालिएको पहलमार्फत हरेक वर्ष २५९० भन्दा बढी नेपाली शिशुको जीवन बचाउन सफल भएको तथ्य सार्वजनिक गरेको छ। यस योगदानले बैंकलाई सामाजिक उत्तरदायित्वमा अग्रणी संस्थाको रूपमा स्थापित गरेको छ।

गत आर्थिक वर्षमा मात्र बैंकले राष्ट्रको कर राजस्वमा रु. ४१ करोड योगदान पुर्‍याएको छ। हाल बैंकले उपत्यका तथा उपत्यकाबाहिर गरी ११८ शाखा, ३ विस्तारित काउन्टर तथा ७५ वटा एटीएममार्फत सेवा विस्तार गरिरहेको छ।