अनलाइन भिसा सेवा प्लेटफर्म ‘ग्लोबल भिसा सेवा डटकम’ सञ्चालनमा

Getting your Trinity Audio player ready…

काठमाडाैँ, वैशाख ३० । नेपालमै पहिलो पटक सञ्चालनमा ल्याइएको फुल–फ्लेज्ड अनलाइन भिसा सेवा प्लेटफर्म ‘ग्लोबल भिसा सेवा डटकम’ औपचारिक रूपमा सार्वजनिक गरिएको छ । काठमाडौंको ठमेलस्थित होटल लो मुस्ताङमा आयोजित विशेष समारोहबीच उक्त प्लेटफर्म सार्वजनिक गरिएको हो ।

भेन्चर्स होलिडेजद्वारा प्रवर्द्धन ग्लोबल भिसा सेवा डटकमका प्रमुख कार्यकारी अधिकृत सुजन पन्तका अनुसार नेपाली यात्रुहरूले भोग्दै आएका जटिल तथा समय लाग्ने भिसा प्रक्रियालाई सहज, सुरक्षित र डिजिटल माध्यमबाट उपलब्ध गराउने उद्देश्यले ‘ग्लोबल भिसा सेवा डटकम’ विकास गरिएको हो ।

कार्यक्रममा बोल्दै उनले भने, “अब सबै नेपाली यात्रुहरूले एउटै सुरक्षित प्लेटफर्ममार्फत विश्वका १८० भन्दा बढी देशहरूको भिसासम्बन्धी जानकारी प्राप्त गर्न, विभिन्न देशका लागि आवेदन दिन तथा आवेदन प्रक्रियाको प्रत्येक चरणको रियल–टाइम अपडेट प्राप्त गर्न सक्नेछन् ।”

उनका अनुसार यस प्लेटफर्ममार्फत एउटै लगइन प्रयोग गरेर विभिन्न देशहरूको भिसा आवेदन प्रक्रिया पूरा गर्न सकिने सुविधा उपलब्ध गराइएको छ । यसले विशेषगरी विदेश भ्रमण, अध्ययन, व्यवसायिक यात्रा तथा पर्यटनका लागि आवेदन दिने नेपालीहरूलाई सहजता प्रदान गर्ने विश्वास गरिएको छ ।

कम्पनीका अनुसार प्रयोगकर्ताले नेपाली रुपैयाँमै सहज रूपमा भुक्तानी गर्न सक्ने व्यवस्था मिलाइएको छ । इसेवा, कनेटआइपीएस, साथै स्वदेशी तथा अन्तर्राष्ट्रिय डेबिट र क्रेडिट कार्डमार्फत भुक्तानी गर्न सकिने प्रणाली विकास गरिएको कम्पनीले जनाएको छ । यसका कारण धेरै देशका भिसा आवेदनका लागि नेपाली आवेदकलाई डलर कार्ड अनिवार्य हुने बाध्यता समेत हट्ने विश्वास गरिएको छ ।

प्लेटफर्मले परम्परागत भिसा आवेदन प्रक्रियामा देखिने झन्झट, लामो लाइन, अपूर्ण जानकारी तथा जटिल भुक्तानी प्रणालीलाई हटाउँदै सम्पूर्ण सेवा डिजिटल माध्यमबाट उपलब्ध गराउने लक्ष्य लिएको छ । यसमा डकुमेन्ट भेरिफिकेसन, प्रि–चेकिङ, अपोइन्टमेन्ट बुकिङ, आवेदन ट्र्याकिङ तथा विशेषज्ञ परामर्श सेवा समेत समावेश गरिएको जनाएको छ ।

कम्पनीले सार्वजनिक गरेको जानकारीअनुसार अनुभवी भिसा विशेषज्ञहरूको टोलीले आवेदन प्रक्रिया, डकुमेन्ट तयारी तथा आवश्यक समन्वयमा सहयोग गर्नेछ । यसले आवेदन अस्वीकृत हुने सम्भावना कम गर्नुका साथै यात्रुहरूलाई थप विश्वसनीय सेवा प्रदान गर्ने विश्वास गरिएको छ ।

कार्यक्रममा उपस्थित अधिकारीहरूले नेपालमा डिजिटल ट्राभल सेवाको बढ्दो विस्तारसँगै यस्तो प्लेटफर्मले नेपाली यात्रुहरूलाई अन्तर्राष्ट्रिय भिसा सेवामा सहज पहुँच दिलाउने बताएका थिए । उनीहरूले प्रविधिमैत्री सेवा विस्तारले नेपालको ट्राभल तथा पर्यटन क्षेत्रलाई नयाँ चरणमा पुर्‍याउने विश्वास व्यक्त गरे ।

कम्पनीले जारी गरेको वक्तव्यमा “भिसा प्रोसेसिङको भविष्य अब डिजिटल, स्मार्ट र अझ बढी कनेक्टेड भइसकेको छ” उल्लेख गरिएको छ । कम्पनीले आफूलाई “नेपालको पहिलो तथा विश्वसनीय ग्लोबल भिसा एप्लिकेसन प्लेटफर्म” का रूपमा प्रस्तुत गरेको छ ।

यो भिसा एप्लिकेसन प्लेटफर्मबाट नेपाली ट्राभल एजेन्सीहरू समेत लाभान्वित हुने कम्पनीको विश्वास छ । यससँगै ट्राभल एजेन्सीहरूले छुट्टै भिसा डेस्क सञ्चालन गर्नुपर्ने, विशेषज्ञ अभावका कारण सेवाको गुणस्तरमा आउने कमी तथा भिसा अस्वीकृत हुने समस्यामा समेत कमी आउने अपेक्षा गरिएको छ ।