प्यारिस, जेठ २३ । विश्व वातावरण दिवसको अवसरमा युनेस्कोले १४ नयाँ जैवमण्डल संरक्षित क्षेत्र घोषणा गरेको छ। यससँगै विश्व जैवमण्डल संरक्षित क्षेत्र नेटवर्क १४५ देशमा ७९७ साइटमा विस्तार भएको छ।
यस वर्ष पहिलोपटक तीन देशले आफ्ना पहिलो जैवमण्डल संरक्षित क्षेत्र पाएका छन् । मोन्टेनेग्रो, तिमोर-लेस्टे र अरुबाको सम्पूर्ण भूभागलाई जैवमण्डल संरक्षित क्षेत्र घोषणा गरिएको छ।
क्यानाडाको क्युबेक सिटीलाई पनि पहिलोपटक सम्पूर्ण शहरकै रूपमा जैवमण्डल संरक्षित क्षेत्र घोषणा गरिएको छ।
नयाँ संरक्षित क्षेत्रहरू अल्बानिया, अल्जेरिया, अजरबैजान, क्यामरून, ईरान, मंगोलिया, पाराग्वे, फिलिपिन्स, पोर्चुगल र भियतनाममा पनि घोषणा गरिएको छ। साथै चीन, इटाली र स्पेनका पाँच पुराना संरक्षित क्षेत्र विस्तार गरिएको छ।
युनेस्कोका महानिर्देशक खालेद एल-एनानीले भने, “जैवमण्डल संरक्षित क्षेत्रहरू प्रकृति संरक्षण र मानव जीवन सुधार प्रतिस्पर्धी लक्ष्य होइनन्। यस वर्षका घोषणा विश्वका सबै महादेशमा फैलिएका छन्, जसले प्रकृतिसँग सन्तुलनमा बस्ने विविध तरिका देखाउँछन्।”
विश्व वातावरण दिवसको अवसरमा युनेस्कोले ओएससीईसँग मिलेर पत्रकारहरूका लागि वातावरणसम्बन्धी रिपोर्टिङमा सहयोग गर्ने व्यावहारिक मार्गदर्शिका पनि सार्वजनिक गरेको छ।
Leave a Reply