जीवित देवी कुमारी, गणेश र भैरवको रथारोहण

काठमाडौं, भदौ २१ — काठमाडौं उपत्यकामा प्राचीन सांस्कृतिक पर्व इन्द्र जात्राको अवसरमा जीवित देवी कुमारीको रथारोहण भएको छ।

बसन्तपुर दरबार क्षेत्रबाट सुरु भएको रथ यात्रा अन्तर्गत कुमारी, गणेश र भैरवका रथहरू शहर परिक्रमा गराइएका छन्। रथ तान्ने कार्यक्रममा राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री केपी शर्मा ओली लगायत उच्च पदस्थ व्यक्तिहरूको उपस्थिति रहेको थियो।

यस अवसरमा पुलुकिसी, लाखे, महाकाली, झ्यालिञ्चा लगायतका परम्परागत नाचहरू प्रदर्शन गरिए। जात्राको प्रारम्भ हनुमानढोकामा इन्द्रध्वजासहितको य:सी (लिङ्गो) ठड्याएर गरिन्छ, जसलाई शक्ति र विजयको प्रतीक मानिन्छ।

इन्द्र जात्रा विशेषगरी नेवा: समुदायद्वारा मनाइने पर्व हो, तर यसको सांस्कृतिक महत्त्वले सम्पूर्ण उपत्यकावासीलाई एकत्रित गराउने काम गर्छ। ललितपुर, भक्तपुर, धुलिखेल, दोलखा लगायतका स्थानहरूमा पनि यो पर्व धूमधामका साथ मनाइन्छ।

यो जात्रा शुक्ल द्वितियादेखि सुरु भई आठ दिनसम्म विविध धार्मिक तथा सांस्कृतिक कार्यक्रमसहित मनाइने चलन छ ।