ओसाका, जापान । ओसाका विश्वविद्यालयका वैज्ञानिकहरूले रक्तनलीमार्फत मस्तिष्कको गतिविधि मापन गर्ने नयाँ तरिका विकास गरेका छन्, जसले खतरनाक शल्यक्रिया बिना नै मस्तिष्कको निगरानी गर्न सकिनेछ।
यो प्रविधीले एपलेप्सी रोगजस्ता समस्याको उपचारमा सहयोगी हुने तथा ब्रेन-कम्प्युटर इन्टरफेसको विकासमा पनि टेवा पुग्ने बताइएको छ।
हाल मस्तिष्कको गतिविधि सिधै मापन गर्न खोपडी खोल्ने वा मस्तिष्कमा इलेक्ट्रोड घुसाउने जस्ता जोखिमपूर्ण प्रक्रिया अपनाइन्छ। इइजी जस्ता सुरक्षित तरिकाहरू छन्, तर ती पर्याप्त सटीक छैनन्। नयाँ विधिले सुरक्षा र सटीकतामा सन्तुलन ल्याएको अनुसन्धानकर्ताहरुले उल्लेख गरेका छन्।
प्रोफेसर टाकुफुमि यानागिसावाको नेतृत्वमा अनुसन्धान टोलीले सुँगुरको मस्तिष्कमा रक्तनलीमार्फत पातलो तारजस्ता इलेक्ट्रोड राखेका थिए। ती इलेक्ट्रोडले परम्परागत विधिजस्तै सटीक तरिकाले मस्तिष्कको संकेतहरू टिपेको थियो। यसले भित्री मस्तिष्क क्षेत्रहरूबाट पनि संकेत टिप्न सक्ने क्षमता देखायो। त्यस्तै, मोटर कोर्टेक्समा इलेक्ट्रोडले अनुहार र काँधमा मांसपेशीको प्रतिक्रिया उत्पन्न गरायो।
अनुसन्धानकर्ता डा. टाकामित्सु इवाताले भने, “यो कम जोखिमयुक्त विधिले एपलेप्सी रोग र अन्य स्नायु सम्बन्धी समस्याको उपचारमा सुधार ल्याउनेछ।”
साथै, गहिरा मस्तिष्कको कार्यसम्बन्धी बुझाइमा सहयोग पुर्याउनेछ र ब्रेन-कम्प्युटर इन्टरफेसको नयाँ युग सुरु गर्नेछ, जसले गम्भीर पक्षघात भएका व्यक्तिहरूलाई उपकरणहरू नियन्त्रण गर्न र संवाद गर्न सक्ने उनको भनाइ छ।
Leave a Reply