–रिभोसाइन्स संवाददाता
२८ कार्त्तिक, काठमाडौं । रसायनशास्त्रीहरुको गैर नाफा मुलक संस्था नेपाल केमिकल सोसाइटीले नयाँ भवन बनाउने भएको छ । हालै बसेको नयाँ कार्यसमितिले भवन बनाउने निर्णय गरेको अध्यक्ष प्राडा निरञ्जन पराजुलीले बताए ।
अध्यक्ष पराजुलीका अनुसार स्थापनाको ४० वर्षसम्म केमिकल सोसाइटी त्रिभुवन विश्वविद्यलय रसायन शास्त्र केन्द्रीय विभाग कीर्तिपुरको परिसरमा बस्यो । संगठित सदस्य ९ सय ३० रहेको सोसाइटीमा प्राडा राजाराम प्रधानाङ्ग अध्यक्ष भएको कार्यसमितिले सोसाइटीका लागि त्यसबेला कीर्तिपुरको भूतखेलमा १२ लाख रुपैयामा जग्गा खरिद गरेको थियो । त्यसै जग्गामा वर्तमान कार्य समितिका पदाधिकारीको नेतृत्वमा भवन बनाउन लागि परेको छ ।
‘केमिकल सोसाइटी त्रिभुवन विश्वविद्यालयसँग आवद्ध वौद्धिक संस्था सबैभन्दा पुरानो संस्था हो । त्यस्ता संस्थालाई त्रिविले जग्गा उपलब्ध गराउने तथा भवनको बन्दोबस्त गर्नु पर्दथ्यो तर त्यसो हुन नसक्दा सोसाइटी आफ्नै पहलमा भवन निमार्ण गर्न लागेको अध्यक्ष प्राडा निरञ्जन पराजुलीले रिभोसाइन्सलाई बताए । ‘अवको डेढ वर्षमा भवन तयार हुनेछ,’ अध्यक्ष पराजुले भने, ‘चन्दा संकलन तथा संस्थाको सदस्यहरुको योगदानले भवन तोकिएको समयावधीमा निर्माण हुनेछ । कम्तीमा १ करोड लागतमा सोसाइटीको आधुनिक भवन बनाउने लक्ष्य छ’
उनका अनुसार देशभर १० हजारको हाराहारीमा रसायनशास्त्रमा विज्ञता हासिल गरेका छन् । तिनीहरुलाई सोसाइटीमा आवद्ध गराउन डेटाबेस तयार गर्न लागिएको अध्यक्ष पराजुलीले बताए ।
त्योसँगै देशभर रहेका केमिष्ट, केमिकल इन्जिनियर, शैक्षिक जनशक्ति, साधन श्रोत, प्राज्ञिक क्षमता, रोजगारीको अवस्था र सम्भावनाका अवसर खोजिने छन् ।
सोसाइटीका संस्थापक महासचिव प्राडा छविलाल गजुरेलले भवन निर्माणमा विशेष आर्थिक सहयोग गर्ने प्रतिबद्धता जनाएको अध्यक्ष डा. निरञ्जन पराजुलीले जानकारी दिए ।
Leave a Reply