एनपीएसको ३९ औँ साधारण सभा सम्पन्न

काठमाडौँ । नेपाल भौतिक विज्ञान समाज(एनपीएस)को ३९ औँ साधारण सभा सम्पन्न भएको छ ।

त्रिभुवन विश्वविद्यालय केन्द्रीय भौतिक शास्त्र विभाग कीर्तिपुरमा आयोजना गरिएको कार्यक्रममा प्रा. डा. केदारलाल श्रेष्ठ स्मृति पुरस्कार,  प्रा. डा. शङ्करप्रसाद र सुदक्षिणा प्रधान स्मृति पुरस्कार र  प्रा. डा. केदार नाथ खनाल स्मृति पुरस्कार वितरण गरिएको छ ।

समाजले यस वर्षका लागि प्रा. डा. केदारलाल श्रेष्ठ स्मृति पुरस्कार ‘पिएचडी ग्राजुएड अवार्ड’ डा. सुरेश बस्नेतलाई प्रधान गरिएको छ ।

प्रा. डा. शङ्करप्रसाद प्रधान र सुधाकृष्ण प्रधान स्मृति पुरस्कार अन्तर्गत त्रिवि भौतिक शास्त्र स्नातकोत्तर सर्वोत्कृष्ट छात्रा अस्मिता साह र छात्र विवेक आचार्यलाई प्रदान गरिएको छ । सोही अन्तर्गत विद्यावारिधि छात्रवृत्ति पुरस्कार विद्या थापालाई दिइएको छ ।

त्यस्तै, एनपीएसले नेपाल भौतिक शास्त्र ओलम्पियाड-२०२२मा उन्नाइस विद्यार्थीहरूलाई नेशनल च्याम्पियनको रूपमा छनोट गरेको थियो । त्यसबाट छनोटमा परेका पाँच विद्यार्थी जापानमा हुने अन्तर्राष्ट्रिय ओलम्पियाड २०२३मा सहभागी गराइदैछ । तर त्यसका लागि आवश्यक सहयोग नहुँदा आ-आफ्नो खर्चमा सहभागी हुन पर्ने वाध्यात्मक परिस्थिति सृजना भएको समाजका अध्यक्ष प्रा. डा. निलम श्रेष्ठले बताइन ।

समाजका अध्यक्ष श्रेष्ठले सन् २०२२ अप्रिल देखि प्रत्येक महिना ‘टक प्रोग्राम’ सञ्चालन गर्दै आइरहेकी बताइन् । उनले ‘एनपीएस जर्नल’ वर्ष ८ को पहिलो, दोस्रो र तेस्रो संस्करण प्रकाशन गरिसकेको र वर्ष ९ अंक १ प्रकाशन हुने तयारीमा रहेको जानकारी गराइन ।

त्यस्तै, सोसाइटीले आगामी सेप्टेम्बर २० देखि २३ सम्म अन्तर्राष्ट्रिय सम्मेलन काठमाडौँमा आयोजना गर्ने जनाएको छ ।

साधारण सभामा त्रिवि केन्द्रीय भौतिक शास्त्र विभागका पूर्व प्राध्यापकहरू डा. लोकनारायण झा, डा. शेखर गुरुङ, डा. उदयराज खनाल र नेपाल खुला विश्वविद्यालयका पूर्व डीन प्रा. डा. इन्द्रबहादुर कार्कीले शुभकामना मन्तव्य दिएका थिए ।