डोङफेङ मोटरको वरिष्ठ टोली नेपालमा, बजार सुदृढीकरणमा जोड

काठमाडौं, पुष १५ । चीनको डोङफेङ मोटर इन्डस्ट्री इम्पोर्ट एन्ड एक्स्पोर्ट कम्पनी लिमिटेडले नेपालमा आफ्नो बजार उपस्थितिलाई थप मजबुत बनाउन वरिष्ठ नेतृत्व टोली पठाएको छ। कम्पनीले सोमबार जानकारी दिँदै नेपालमा सञ्चालन भइरहेको गतिविधि, बजार प्रदर्शन, पूर्वाधार तथा बिक्रीपछिको सेवाको समीक्षा गरिएको जनाएको छ।

कम्पनीका अध्यक्ष वाङ लङको नेतृत्वमा आएको टोलीमा रणनीतिक सञ्चालन विभागका निर्देशक झाओ सियाओजिए, मानव संसाधन विभागका निर्देशक चेन जियान, तथा दक्षिण एसिया क्षेत्रीय प्रबन्धक हे जिक्सिन सहभागी थिए। टोलीले नेपालमा विद्यमान सुविधा अवलोकन गर्दै भविष्यमा उत्पादन विस्तार, ग्राहक अनुभव सुधार र ब्रान्ड सुदृढीकरणका रणनीतिहरुमा छलफल गरेको थियो।

भ्रमणका क्रममा डोङफेङ प्रतिनिधिहरुले नेपाली ग्राहकलाई नम्मी कार हस्तान्तरण गरेका थिए। कम्पनीका अनुसार यो हस्तान्तरणले नेपालमा विश्वसनीय र मूल्य–केन्द्रित मोबिलिटी समाधान उपलब्ध गराउने प्रतिबद्धता झल्काएको छ।

भ्रमण सकारात्मक छलफलसहित सम्पन्न भएको कम्पनीले जनाएको छ। डोङफेङ मोटरले नेपालमा पूर्वाधार सुदृढीकरण, सेवा गुणस्तर सुधार तथा विकसित हुँदै गएको नेपाली विद्युतीय सवारीसाधन बजारमा नयाँ सम्भावना खोज्ने प्रतिबद्धता दोहोर्याएको छ।