एभरेष्ट र इन्टुजी बीच सम्झौता 

ललितपुर । एभरेष्ट इन्जिनियरिङ कलेज र एआई कम्पनी इन्टुजी बीच आपसी सहयोगको सम्झौतामा हस्ताक्षर भएको छ ।

इन्टुजीका प्रमुख सुचना अधिकारी रितेश शाहले उच्च इन्जिनियरिङ शिक्षा क्षेत्रमा देशकै सर्वोत्कृष्ट कलेजहरू मध्येमा परेको एभरेष्ट इन्जिनियरिङ कलेजसँग सहकार्यको सम्झौता आफ्नो कम्पनीको लागि गौरवको विषय भएको धारण व्यक्त गरेका थिए।

तीन वर्ष अगाडि देखि नेपालमा काम गर्दै आएको यस कम्पनी र कलेज बीच लामो समय देखि आपसी सहयोगका विभिन्न कार्यक्रमहरू हुँदै आएको थियो । कार्यक्रमहरूलाई थप प्रभावकारी बनाउन तथा वैधानिकता दिन औपचारिक सम्झौता गरेको कलेजले जनाएको छ ।

सम्झौता अन्तर्गत इन्टुजी प्रा.लि. का कार्यक्रमहरू सञ्चालन गर्न कलेजले भौतिक सुविधाहरू उपलव्ध गराउने र कलेजका विद्यार्थीहरूलाई व्यवहारिक ज्ञान तथा इन्टर्नसिपको अवसर उक्त प्रा.लि. ले दिने भएको छ। यस सम्झौताबाट एभरेष्ट इन्जिनियरिङ कलेजका कम्प्युटर, सफ्टवेयर र आईटीका विद्यार्थीहरू प्रत्यक्ष लाभान्वित हुने भएको छ।

नेपालका विभिन्न नीजि कम्पनीहरूमा एभरेष्ट इन्जिनियरिङ कलेजका विद्यार्थीहरूले २५ वर्ष अगाडि देखि आफ्नो सीप तथा दक्षता प्रदर्शन गर्दे आएको र यस कलेजका विद्यार्थीहरूलाई पहिले देखि नै नीजि कम्पनीहरूले रुचाउँदै आएको कलेजको तथ्याङ्कबाट देखिएको छ।

इन्टुजी अष्ट्रेलियाका नागरिकहरूको प्रत्यक्ष लगानी र स्वामित्वमा नेपालमा सञ्चालित एआई कम्पनी हो ।