काठमाडौँ । नेपाल इन्जिनियरिङ कलेज (नेक)की प्राध्यापक सावित्री त्रिपाठीले इम्पेरियल कलेज लण्डनको ग्लोबल कनेक्ट फण्ड अन्तरगतको एक परियोजनामा छनौट भएकी छन् ।
कलेज सञ्चालक समिति सदस्य समेत रहनु भएकी प्राध्यापक त्रिपाठी ‘भारत र नेपालमा बजारको तत्परता र ठुलो परिमाणमा कार्यान्वयनका लागि वास प्रविधिहरूको मूल्याङ्कनको लागि क्षेत्रीय प्लेटफर्म निर्माण’ परियोजनामा छनौट भएकी हुन् ।
यस परियोजनामा इम्पेरियल कलेज लण्डनका प्रमुख अनुसन्धानकर्ता प्राध्यापक माइकल टेम्पलेटनले नेतृत्व गर्नेछन् भने, प्राध्यापक त्रिपाठी तथा भारतको मणिपाल युनिभर्सिटीका प्राध्यापक युनिका सोगानीले सह अनुसन्धानकर्ताको रूपमा काम गर्नेछन्।
एक वर्षे यो परियोजनामा प्राध्यापक त्रिपाठीले नेपालमा सरसफाइ प्रविधिहरूको अन्वेषण, अध्ययन र भविष्यमा तिनीहरूको व्यवसाय विस्तारमा नेतृत्व लिनेछन् । परियोजनाले सरसफाइ प्रविधिहरूको विस्तृत रुपमा योजनाबद्ध रिपोर्ट तयार गर्ने र तिनीहरूको बजारीकरण विस्तारको रणनीति बनाउने छ ।
यस परियोजनाले विद्यार्थीहरू र सरसफाइ क्षेत्रमा काम गर्ने अनुसन्धानकर्ताहरूको विकासमा महत्त्वपूर्ण योगदान पुर्याउने विश्वास गरिएको छ । प्राध्यापक त्रिपाठी कलेजको विज्ञान तथा मानविकी सङ्कायमा कार्यरत छन् ।
Leave a Reply